ՀԱԿ Վանաձորի գրասենյակի ղեկավար Աշոտ Մանուկյանը կարծում է, որ ՀՀ իշխանությունները այդկերպ միտված են անհրաժեշտ պահին զսպելու ընդդիմությանը
ՄԻնչ ՀՀ վերաքննիչ դատարանում շարունակվում է քաղբանտարկյալ Տիգրան Առաքելյանի եւ Հայ ազգային կոնգրեսի մյուս ակտիվիստների դատաքննությունը, ՀԱԿ Վանաձորի գրասենյակի ղեկավար Աշոտ Մանուկյանը Aravot.am-ի հետ զրույցում քաղաքական ներկայացում է որակում շուրջ երկու տարի ձգձգվող դատավարությունները:
«Սա քաղաքական շոու է, ես դատավարություն չեմ տեսել, չի եղել, եղել է ընդամենը քաղաքական պատվեր»,-ասում է Աշոտ Մանուկյանը:
Ըստ նրա, երիտասարդ ակտիվիստ Տիգրան Առաքելյանին շուրջ երկու տարի անազատության մեջ պահելը միայն մեկ նպատակ է հետապնդում` անհրաժեշտ պահին զսպել ընդդիմությանը:
Կարդացեք նաև
«Մեր դատարանները ողորմելի մի վիճակում են գտնվում, մեխանիկորեն դատարան ենք անվանում, բայց իրականում դատարան մենք չունենք, մենք ունենք պատժիչ մի կառույց, մի օրգան, որը կատարում է իշխանությունների պատվերը` կոնկրետ Սերժ Սարգսյանի պատվերը: Իշխանությունը Տիգրան Առաքելյանին պատանդ է պահում, նպատակը ընդդիմությանը անհրաժեշտ պահին Տիգրանով զսպելն է, այսինքն` եթե ինչ-որ խնդիրներ առաջանան, որ այլ միջոցները սպառված կլինեն, ես մտածում եմ, որ կօգտագործեն Տիգրանի կալանավորված լինելու փաստը եւ կփորձեն կամ առեւտրի մեջ մտնել կամ սպառնալ, որ Տիգրանի հետ շատ ավելի վատ բաներ կկատարվեն, եթե իրենց պահանջները չկատարվեն»,-ասում է ՀԱԿ Վանաձորի գրասենյակի ղեկավարը:
Տիգրան Առաքելյանին մեղադրանք է առաջադրվել այն բանի համար, որ 2011թ. օգոստոսի 9-ին ժամը 21-ի սահմաններում, Երևան քաղաքի Տերյան փողոցի թիվ 42 շենքի մոտ, Արտակ Վոլոդյայի Կարապետյանի հետ միասին, իշխանության ներկայացուցիչներ հանդիսացող, Տերյան փողոցում պարեկային ծառայություն իրականացնող ՀՀ Ոստիկանության Երևան քաղաքի վարչության ՊՊԾ գնդի 3-րդ հատուկ գումարտակի ոստիկաններ Վոլոդյա Գրիգորյանի և Դավիթ Մելիքյանի նկատմամբ, կապված նրանց կողմից իրենց ծառայական պարտականությունները կատարելու հետ, գործադրել են նրանց կյանքի կամ առողջության համար ոչ վտանգավոր բռնություն` Տիգրան Առաքելյանը բռունցքով հարվածել է Դավիթ Մելիքյանի պարանոցին` վերջինիս պատճառելով առողջությանը թեթև վնասի հատկանիշներ չպարունակող ճանկռվածքի ձևով մարմնական վնասվածք, իսկ Արտակ Կարապետյանը քաշել պոկել է նրա ուսադիրն ու տարբերանշանը:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը` դատավոր Գագիկ Պողոսյանի նախագահությամբ, 6 տարվա ազատազրկման է դատապարտել Տիգրան Առաքելյանին: ՀՀ վերաքննիչ դատարանն էլ անփոփոխ էր թողել իր նախորդի կայացրած վճիռը: ՀՀ վճռաբեկ դատարանի` վերաքննիչ դատարանի կայացրած որոշումների դեմ բերված բողոքները մասնակի բավարարելու արդյունքում էլ ՀԱԿ ակտիվիստների գործը կրկին վերաքննիչում է:
Անուշ Բ ՈՒԼՂԱԴԱՐՅԱՆ
