«Սթար» սուպերմարկետների ցանցը բանակցություններ է վարում առաքիչների հետ՝ պարտքի վերաձեւակերպման համար: Այդ մասին ասվում է «Սթար Դիվայդ» ՓԲԸ-ի գրավոր մեկնաբանության մեջ, որը ստացել է NEWS.am-ը:
Հուլիսի 29-ին ընդհանուր իրավասությունների դատարանը բավարարել էր «Սթարի» սնանկացման վերաբերյալ «Պերնո Ռիկար Հայաստան» ՓԲԸ-ի հայցը: Օգոստոսի 9-ին «Սթար Դիվայդը» դիմել էր Վերաքննիչ դատարան: «Ընկերությունը բոլոր ատյաններում կվիճարկի սնանկացման փաստը՝ իր առջեւ ունենալով ֆինանսական կայունացման հստակ ծրագիր»,- ասվում է մեկնաբանության մեջ:
Վերջին ժամանակներս ընկերությունը փակել է ոչ բավարար եկամտաբերությամբ մի քանի խանութ: «Ապագայում ընկերությունը նախատեսում է բացել նոր արդյունավետ խանութներ, այդ թվում նաեւ Հայաստանի մարզերում՝ գնորդներին ավելի մոտ դառնալու նպատակով»,- ընդգծում են ընկերությունում:
Նշենք, որ «Պերնո Ռիկար Հայաստանի» հայցն ընդդեմ «Սթար Դիվայդի» կազմում է 71 մլն դրամ: Ներկրողների նկատմամբ «Սթարի» պարտավորվածության ընդհանուր չափը չեն հաղորդել, հայտնելով, որ ներկա պահին ներկրողների հետ բանակցություններ են ընթանում պարտքի վերաձեւակերպման համար՝ «փոխադարձ համաձայնությունների եւ զիջումների հիման վրա»:
Կարդացեք նաև
Այն հարցին, թե արդյոք պատրաստվում են «Սթարի» ակտիվները վաճառել Հայաստանում բացվել նախապատրաստվող ֆրանսիական Carrefour ցանցին (կամ նրա գործընկեր, արաբական Majid al-Futtaim ընկերությանը), ընկերությունում պատասխանեցին, որ առայժմ վաղ է այդ մասին խոսել:
