Երեկ երեկոյան Սիսակյան թիվ 3 վթարային շենքից սկսել են քարեր պոկվել եւ ցած թափվել: Այս մասին Սիսակյանի բնակիչները ահազանգել են արտակարգ իրավիճակների նախարարություն (ԱԻՆ): Բնակիչները հայտնել են, որ պոկվում են շենքի կողային պատի քարերը: Ըստ ԱԻՆ-ի, դեպքի մասին տեղեկացվել են Աջափնյակ վարչական շրջանի ղեկավարը, Աջափնյակ վարչական շրջանի ղեկավարի աշխատակազմի կոմունալ բաժնի պետը, Երեւանի քաղաքապետարանի քաղաքաշինության եւ հողի վերահսկողության վարչության պետը, կոմունալ տնտեսության վարչության պետը, շինարարության եւ բարեկարգման վարչության պետը: Բնակիչների ահազանգին արձագանքած ԱԻՆ օպերատիվ խումբը պարզել է, որ շենքի կողային պատի քարերը գտնվում են թուլացած վիճակում եւ պարբերաբար թափվում են: Շենքի հիմնական պատերին եւ բնակարանների ներսում առկա են ճաքեր, շենքի կոյուղագծերը գտնվում են անմխիթար վիճակում, ինչի հետեւանքով կոյուղաջրերը հոսում են պատերով` առաջացնելով հակասանիտարական վիճակ: Հրշեջ-փրկարարները սահմանազատել են շենքի վտանգավոր տարածքը:
Սիսակյան 3 շենքը 4-րդ կարգի վթարային աստիճանի շինություն է համարվում` սկսած 2003 թվականից: Նախարարության մասնագետների մեկնաբանմամբ, տանիքի ծածկը վնասված է, ինչի հետեւանքով անձրեւաջրերը թուլացնում են շենքի կառուցատարրերը: Անվտանգության նկատառումներից ելնելով` բնակիչներին առաջարկվել է գիշերել այլ կացարաններում, սակայն նրանց պահանջն է իրենց ապահովել նոր բնակարաններով:
Սիսակյան բնակիչների բողոքներին կառավարությունից, Երեւանի քաղաքապետարանից պատասխանում են, որ տվյալ շենքի համար կա կառավարության որոշում եւ գումար լինելուն պես բնակիչները կտարհանվեն ու կապահովվեն նոր բնակարաններով: Այսօր Aravot.am-ի հարցին, թե երեկվա քարաթափումների դեպքից հետո, հատկապես, երբ ԱԻՆ-ը բնակիչներին առաջարկել է այլ վայրում գիշերել, որեւէ ռեալ որոշում կայացվե՞լ է Սիսակյան 3 շենքի բնակիչների հարցը լուծելու ուղղությամբ, Երեւանի քաղաքապետարանից ասացին. «Սիսակյան 3 շենքն առաջնահերթությունների ցանկում է, որի համար ՀՀ կառավարությունը նախատեսում է գումար հատկացնել, երբ նախատեսված գումարները կհատկացվեն, Երեւանի քաղաքապետարանն անմիջապես ձեռնամուխ կլինի, իր լիազորությունների շրջանակում այդ գործընթացն ապահովելուն»:
Լուսինե ԲՈՒԴԱՂՅԱՆ
