«Եթե Թուրքիան ցանկանում է ինչ-որ բանով օժանդակել հակամարտության կարգավորմանը, ապա միակ աջակցությունը կարող է լինել չխառնվելը»,-Aravot.am-ի հարցին՝ ինչպե՞ս է որակում Թուրքիայի արտգործնախարար Ահմեթ Դավութօղլուի՝ Գաբալայում արված հայտարարությունն, այսպես պատասխանեց ՀՀ ԱԳՆ խոսնակ Տիգրան Բալայանը:
Հիշեցնենք, որ երեկ Գաբալայում ելույթ ունենալով թյուրքալեզու երկրների արտգործնախարարների խորհրդի նիստի ժամանակ Դավութօղլուն հայտարարել է. «Թուրքիան պատրաստ է անել հնարավոր և իրենից կախված ամեն ինչ՝ կանգնեցնելու համար Հայաստանի կողմից ադրբեջանական հողերի օկուպացումը»: Ավելին, նշել է, թե իբր Լեռնային Ղարաբաղի հակամարտությունը խոչընդոտում է Հարավային Կովկասում կայունության ապահովմանը ու շեշտել. «Լեռնային Ղարաբաղի և Ադրբեջանի մյուս օկուպացված տարածքների ազատագրումը շարունակում է մնալ մեր արտաքին քաղաքականության հիմնական ուղղություն, մենք հետայսու էլ կգործենք այդ հունով: Մենք կտրականապես բողոքում ենք ադրբեջանական հողերի 20 տոկոսի օկուպացման և մեր եղբայր ադրբեջանցիներին իրենց տներից բռնի արտաքսելու դեմ»:
Ըստ Տիգրան Բալայանի՝ այսօրինակ հայտարարությունները միայն խանգարում են հակամարտության խաղաղ կարգավորմանը: Ամփոփելով ասելիքը՝ պարոն Բալայանը շեշտեց. «Թուրքիան իր կողմնակալ դիրքորոշմամբ չի կարող օգտակար լինել»:
Տաթև ՀԱՐՈՒԹՅՈՒՆՅԱՆ
Ազատություն եւ անկախություն Արցախի Հանրապետությանը հարեւաններից՝ Հայաստանի եւ Ադրբեջանական հանրապետություններից: