«Ուսման վարձերը թանկացել են, որպեսզի կրկին անգամ ժողովրդի` այս դեպքում ուսանողների հաշվին, լցնեն իրենց գրպանները: Միաժամանակ ինձ թվում է, որ այս բոլոր թանկացումները մի ամբողջական շղթա են կազմում` սոցիալական բունտ առաջացնելու նպատակով: Թե կոնկրետ ում է դա ձեռնտու, կարելի է միայն կռահել»,-այսօր Aravot.am-ի հետ զրույցում նշեց վարձավճարների թանկացման դեմ գնացող ակտիվիստ Լեւոն Ստեփանյանը:
Նրա խոսքով ներկա պահին իրենք տարբեր միջոցներով փորձում են հասնել այդ որոշման կասեցմանը: Նախարարի հետ հանդիպումը որևէ դրական նշանակություն չունեցավ, քանզի նա չցանկացավ լսել լայն հանրության կարծիքը: Այժմ փորձում են կապեր հաստատել առավելագույն թվով առաջին կուրսեցիների և նրանց ծնողների հետ, որպեսզի միասին պայքարեն այդ որոշման իրականացման դեմ.
«Մեր գերխնդիրը նրանում է, որ հասնենք այդ վարձերի նախկին չափի վերականգնմանը: Որքանով է բարոյական, այսպիսի ծանր պայմաններում գտնվող երկրում մի հատ էլ բարձրացնել ուսման վարձը: Ասում են իբր դա ուսման որակի կամ դասախոսների աշխատավարձի բարձրացման համար է: Բայց մենք տեսել ենք, թե ինչպես է բարձրացել ուսման որակը այս տարիների ընթացքում: Իսկ աշխատավարձերը կարելի է բարձրացնել նաև ռեզերվի միջոցով, ինչպես արեցին Մանկավարժականում, կամ այլ միջոցներով»:
Ակտիվիստը համոզված է, որ այս ամենն արվում է միտումնավոր.
Կարդացեք նաև
«Մի կողմից նրանք սովորել են ամենաթողության մթնոլորտին, երբ կայացնում են որոշումներ` իրենց նեղ կլանային շահերից ելնելով ու դիմադրության չեն հետապնդում: Սակայն վերջին իրադարձությունները ցույց տվին, որ քաղաքացիները կարող են համախմբվել և իրենց կամքը պարտադրել վարչախմբին: Մյուս կողմից էլ, ես նկատում եմ վտանգավոր վիճակ, որ սա արվում է որոշակի անկայուն վիճակ ստեղծելու համար, որ կարող է թելադրվել դրսի ուժերի կողմից»:
Անկախ ամեն ինչից նրանք պայքարելու են բոլոր տեսակ ապօրինությունների ու թանկացումների դեմ, քանզի դրանով կարելի է վերականգնել հավատը ժողովրդի մոտ ու գոնե կասեցնել արտագաղթի նոր ալիքը:
Անժելա ՇԱՀՈՒՄՅԱՆ
