Նախագահի նախկին թեկնածու Անդրիաս Ղուկասյանը Aravot.am-ի հարցին՝ ճի՞շտ են արդյոք այն լուրերը, թե քաղաքապետարանը պահանջել է իրեն պատկանող «Ռադիոհայ» ընկերությանը ազատել քաղաքապետարանին պատկանող տարածքը` պատասխանեց. «Այո: 2002 թվականին կառավարությունը որոշում ընդունեց անհատույց տարածքներ տրամադրելու մասին եւ այդ պահից սկսած «Ռադիոհայը» զբաղեցրել է այդ տարածքը: Առհասարակ, դեռեւս 1995 թվականին ռադիոկայանը հիմնադրվել է հենց այդ հասցեում: Այժմ քաղաքապետարանը վերանորոգում է կատարել, շենքի այդ հատվածում տեղափոխել իր վարչական մարմինները եւ ներկայացրել պահանջ՝ ազատել տարածքը, դրա հետ կապված մենք դիմել ենք քաղաքապետին, որ որոշակի ժամկետի մեջ պատրաստվենք, նոր տեղ պատրաստենք եւ ռադիոյի աշխատանքը չխափանվի»:
Իսկ թե ինչու հիմա որոշվեց, որ «Ռադիոհայը» պետք է տեղափոխվի, արդյոք պատճառը Ղուկասյանի քաղաքացիական անհնազանդությունն էր, իր պայքարի ձեւերը, մեր զրուցակիցը նշեց. «Ընդհանուր քաղաքականություն կար, թե ինչու հիմա՝ չեմ կարող ասել, բայց այս խնդիրը կար դեռ 2010 թվականին, այսինքն՝ խնդիրն առաջացել էր դեռեւս նախագահական ընտրություններից առաջ: Այն ժամանակ քաղաքապետարանը պատրաստ էր այլ տարածք տրամադրել, դրանից հետո, դեռ Կարեն Կարապետյանի ժամանակ, երբ որոշվեց, որ քաղաքապետարանի աշխատակազմը պետք է կրճատել, ոչ թե ընդլայնել, այս խնդիրը սկզբունքորեն դուրս եկավ: Իսկ Տարոն Մարգարյանի գալուց հետո նա պնդում է, որ «Ռադիոհայը» պետք է դուրս գա այս տարածքից: Քաղաքապետարանն առաջարկեց ուրիշ տարածք, բայց արդեն վարձավճարով, ինչը մեր ռադիոյի համար ընդունելի չէր»:
Ղուկասյանը նաեւ հավելեց, որ անկախ ամեն ինչից, «Ռադիոհայը» շարունակելու է որպես ինֆորմացիոն գործընկեր աջակցել քաղաքապետարանին:
Եվա ՀԱԿՈԲՅԱՆ
