«Ես նման հիմքեր չունեմ»,- Aravot.am-ի հարցին՝ քաղբանտարկյալ համարո՞ւմ եք հասարակական ակտիվիստ Միհրան Մելքոնյանին (լուսանկարում), ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Հիշեցնենք, որ այսօր նախագահի նախկին թեկնածու Անդրիաս Ղուկասյանը նամակով դիմել էր ՀՀ-ում գործող իրավապաշտպան հ/կ-ներին, որում մասնավորաբար ասված է . «Դիմում եմ հասարակական գործիչներին, ովքեր հանրության առջեւ ստանձնել են Հայաստանում իրավունքի պաշտպանություն իրականացնելու պարտականություն, պարզություն մտցնել հետեւյալ հարցում` Միհրան Մելքոնյանը քաղբանտարկյա՞լ է։ Եթե այդպես է, ապա դա նշանակում է, որ վարչախումբը կրկին որոշել է կասեցնել ընդդիմադիր շարժումները` դրանց մասնակիցների ազատազրկման միջոցով»։
ՀՀ մարդու իրավունքների առաջին պաշտպան Լարիսա Ալավերդյանն Aravot.am-ի հետ այս թեմայով զրույցում ասաց, որ օրենքի տեսանկյունից կա այն իրավական հիմքը, ինչը, որ այժմ կատարվում է Միհրան Մելքոնյանի հետ: «Բայց խնդիրն այստեղ այն է, որ այստեղ ոստիկանության կողմից կան անգործության նշաններ, որովհետեւ, ինչքանով հասկացանք, իրենք մինչ այդ շփվել են այդ երիտասարդի հետ եւս մի քանի անգամ: Եվ այն, որ, փաստորեն, եկել է պահը, որ իրեն ուղղակի հանել այդ շարժումից, դրանում կարելի է տեսնել քաղաքական նշույլ: Միաժամանակ, իհարկե, օրենքի առումով կան հիմքեր. ինքը չի բնակվում այն վայրում, որտեղ գրանցված է ու օրենքի առումով կա այդ հնարավորությունն՝ իրեն ձերբակալելու»,- ասաց տիկին Ալավերդյանը:
Նելլի ԳՐԻԳՈՐՅԱՆ
Այո, ինքը պետք է համարվի քաղաքացիականբանտարկյալ: 🙂