Այսօր թեեւ կառավարության հերթական նիստն ավարտվել էր եւ բարձրաստիճան պաշտոնյաների մեծ մասն արդեն գնացել էին, Սիսակյան 3 հասցեի վթարային շենքի բնակիչները «Սիսակյան 3-ը մահվան սպառնալիքի տակ է» պաստառներով եկան կառավարության շենքի մոտ, որտեղ իրենց դժգոհությունն արտահայտեցին կառավարությանը:
Բնակիչների ներկայացմամբ` շենքում բնակվելն այն աստիճան վտանգավոր է, որ ցանկացած պահի հնարավոր է այն փլվի:
2013-2015 թվականների ընթացքում կառավարությունը խոստացել է այս վթարային շենքի բնակիչներին նոր բնակարաններ հատկացնել, սակայն ինչպես Aravot.am-ի հետ զրույցում ասացին բնակիչները` մինչեւ 2015 թվականը շենքն արդեն գերեզման կդառնա:
Բնակիչներից մեկի` Ամալյա Սարդարյանի պատմելով. «Օրեցօր քարերը պոկվում ընկնում են: Ասում են զուգարանները փակեք, բա որտե՞ղ գնանք զուգարան, հանրակացարանային տիպի շենք է, 20 ընտանիքով 1 զուգարանից ենք օգտվում: Շենքը նույնիսկ տանիք չունի: 400 բնակիչ է ապրում: Թող տան մեր բնակարանները, ամեն ինչի համար փող ունեն, մեր համար չունեն: Կառավարությունը թող մտածի` մենք այդտեղ երեխաներ ենք պահում, վաղը գալու են ասեն` տղուդ տուր տանում եմ ծառայության, բայց էդ երեխան առո՞ղջ է մեծանում, ոչ»:
Կարդացեք նաև
«Հարգելի կառավարություն, ապահովեք մեր եւ մեր երեխաների անվտանգությունը»,-բացականչում էին ցուցարարները, սակայն այս արտահայտությանն արձագանքեց իրացման գոտու «զոհերից» մեկն», ասելով` «Ի՞նչ հարգելի, չէ մի չէ… կործանում` բռնակալ իշխանությանը»:
Նելլի ԲԱԲԱՅԱՆ
