Քիչ առաջ «Ժառանգություն» կուսակցության Կապանի տարածքային գրասենյակի պատասխանատու Սամվել Հայրապետյանից տեղեկացանք, որ «Ժառանգություն»-ը որոշել է թիվ 38 ընտրատարածքում առաջադրել հենց իր թեկնածությունը եւ քիչ հետո փաստաթղթերը կներկայացնի թիվ 38 ԸԸՀ:
Սամվել Հայրապետյանը 59 տարեկան է, ծնվել է Կապանում, ունի 2 տղա, սովորել է ֆիզկուլտուրայի ինստիտուտում, ներկա պահին աշխատում է «Շիկահող» պետական արգելոցում՝ որպես որսահսկիչ:
Սամվել Հայրապետյանը ազատամարտիկ է, Արցախյան գոյամարտի մասնակից, մարտական գործողությունների ժամանակ Կապանի ջոկատի հրամանատար է եղել:
-Պարո՛ն Հայրապետյան, ինչպես արդեն տեղեկացանք, «Ժառանգություն»-ից որպես պատգամավորի թեկնածու Դուք եք առաջադրվելու թիվ 38 ընտրատարածքում: Ինչո՞վ էր պայմանավորված այդ որոշումը, ինչո՞ւ որոշեցիք առաջադրել Ձեր թեկնածությունը:
Կարդացեք նաև
-Ի սկզբանե ես մտադիր չէի իմ թեկնածությունն առաջադրել այս ընտրատարածքում: Վերջին երեք ամիսներին հետեւելով մայրաքաղաքում ազատամարտիկների բողոքներին, որոշեցի պատգամավորի թեկնածու առաջադրվել եւ ընտրվելուց հետո այդ հարցերն ինքս բարձրացնել ԱԺ-ում: Ընտրվելուց հետո առաջին գործողությունս դա է լինելու: Ես կռվի առաջին օրից մինչեւ վերջին օրը մարտի դաշտում եմ եղել, թեժ կռիվների մասնակից եղել, Լաչինի մարտական գործողություններին անմիջապես մասնակցել, Կապանի ջոկատը ղեկավարել: Ազատամարտիկներին մտահոգող բոլոր հարցերը կբարձրացնեմ ԱԺ-ում:
-Որքա՞ն եք հավանական համարում Ձեր ընտրվելը, ի վերջո Ձեր մրցակիցը ՀՀԿ-ից է լինելու:
-Եթե ես 100 տոկոս վստահ չլինեի, չէի առաջադրի իմ թեկնածությունը: Ես վստահ եմ, որ կընտրվեմ:
-Իսկ ինչո՞վ եք հիմնավորում Ձեր այդ վստահությունը:
-Նախագահական ընտրությունների օրինակով: Դուք գիտեք այդ ժամանակ «Ժառանգություն»-ն ինչքան ձայն է հավաքել, այդ բոլոր ձայներն իմն են լինելու եւ էլի շատ ձայներ: Ազատամարտիկներն էլ են իմ օգտին քվեարկելու:
-Այսինքն դուք մեծ ակնկալիքնե՞ր ունեք Կապանի տարածաշրջանից: Իսկ Մեղրիից ու Ագարակից ի՞նչ սպասելիքներ ունեք:
– Այդքան էլ մեծ չեն ակնկալիքներս Մեղրու տարածաշրջանից, ինչքան ձայն կտան-կտան: Բայց քարոզարշավի ժամանակ բոլոր տեղերում լինելու ենք՝ Մեղրի, Ագարակ էլ եմ գնալու, գյուղեր էլ եմ այցելելու քաղաքներից բա
Հիշեցնենք, որ Կապանի եւ Մեղրու տարածաշրջաններում պատգամավորի թեկնածուների քարոզարշավը մեկնարկելու է սեպտեմբերի 1-ից եւ կտեւի մինչեւ սեպտեմբերի 27-ը ներառյալ:
Մերի ՍՈՂՈՄՈՆՅԱՆ
