Azatutyun. am Ռուսաստանի մայրաքաղաքի քաղաքապետի ընդդիմադիր թեկնածու Ալեքսեյ Նավալնին շարունակում է բացահայտել իր մրցակցի` Մոսկվայի քաղաքապետի պաշտոնակատար և քաղաքապետի թեկնածու Սերգեյ Սոբյանինի հարազատների միլիոնների հասնող կարողությունները:
Հիշեցնենք, օրեր առաջ Նավալնին արդեն մի սկանդալային բացահայտում արել էր Սոբյանինի անչափահաս դստերը՝ 16-ամյա Օլգային պատկանող 5․5 միլիոն դոլար արժողությամբ բնակարանի վերաբերյալ, նշելով, որ դա նույն բնակարանն է, որը Տյումենից Մոսկվա եկած պետական ծառայող Սոբյանինին տրվել էր որպես ծառայողական բնակարան և որը նա ըստ օրենքի իրավունք չուներ սեփականաշնորհել:
Այս սկանդալը դեռ չմարած՝ Ալեքսեյ Նավալնին նոր բացահայտումներ է կատարում, այս անգամ Սոբյանինի ավագ դստեր` 27-ամյա Աննա Սոբյանինայի բնակարանի վերաբերյալ: Պարզվում է՝ Մոսկվայի գործող քաղաքապետի ավագ դուստրն էլ Սանկտ Պետերբուրգի կենտրոնում 200 քառակուսի մետրից ավելի մակերեսով բնակարանի տեր է, որի մոտավոր արժեքը 3․5 միլիոն դոլար է կազմում:
Նավալնին հեգնում է, որ, իհարկե, Սոբյանինի 27-ամյա դուստրը սեփական քրտինքով է վաստակել միլիոնները, քանի որ զարմանալիորեն տաղանդավոր բիզնես լեդի է, և հավելում է՝ նրա գործարար ջիղը ի հայտ է գալիս հենց այն ժամանակ, երբ հայրը պետական ծառայության է անցնում:
Կարդացեք նաև
Նավալնին իր հոդվածում բաց և հրապարակային աղբյուրների տեղեկատվությունը բերելով՝ ներկայացնում է, թե ինչ բիզնեսով է զբաղվում Սոբյանինի աղջիկը և որն է նրա հաջողության գաղտնիքը: Պարզվում է, Աննա Սոբյանինան հիմնադրել է «Ֆորուս գրուպ» ընկերությունը, որը զբաղվում է շինարարությամբ, նախագծային աշխատանքներով և սեփական կահույքի արտադրամասն ունի: Նավալնին նկատում է, որ այդ ընկերության հաճախորդների գերակշիռ մասը պետական կառույցներ են, օրինակ՝ պաշտպանության նախարարությունը հենց Սոբյանինայի կազմակերպությանն է պատվիրել ընդունելությունների տունը կառուցելն ու բանակցությունների դահլիճը կահավորելը, Ռուսաստանի կառավարության պատվերով էլ ընկերությունը կահավորել է խորհրդակցությունների դահլիճը և այլն: Խանտի Մանսիյսկում ընկերությունը կառուցել է տեղի վարչակազմի շենքը, նաև այլ շատ ու շատ շինություններ: Ի դեպ՝ Խանտի Մանսիյսկի ինքնավար մարզը գտնվում է Տյումենի մարզի կազմում, որի նահանգապետը 2001-2005 թվականներին Սերգեյ Սոբյանինն էր:
Նավալնին շեշտում է, որ այս պատվերները Աննա Սոբյանինան ստացել է առանց մրցույթի, և հավելում է․ – «Ինչպիսի զուգադիպություն, պետական ծառայող Սոբյանինի տաղանդավոր դուստրը կահույք է մատակարարում այնտեղ, որտեղ պետծառայում է իր հայր Սերգեյ Սոբյանինը: Իսկ Աննա Սոբյանինայի ընկերության գործունեությունը բացառապես տարածվում է Մոսկվայի, Սանկտ Պետերբուրգի և Խանտի Մանսիյսկի պետական կառույցների վրա»:
Իր հարցադրումները Նավալնին ուղղում է թե՛ Սոբյանինին, թե՛ Ռուսաստանի գլխավոր դատախազությանը:
Մինչդեռ Սոբյանինի հարազատների միլիոնանոց բնակարանների մասին բացահայտումներից անմիջապես հետո դատախազությունը ստուգումներ է սկսել Ալեքսեյ Նավալնու քարոզարշավի նախընտրական ֆինանսական հիմնադրամում՝ կասկածելով օտարերկրյա ֆինանսավորում ստանալու մեջ:
Տաթեւիկ ԼԱԶԱՐՅԱՆ
«Ազատություն» ռադիոկայան
