Webtv.am հայկական մշակութային ինտերնետ հեռուստատեսությունը հետաքրքիր նախաձեռնությամբ է հանդես եկել: Ինչպես Aravot.am-ի հետ զրույցում հայտնեց Webtv.am-ի տնօրեն Արայիկ Մանուկյանը, որոշել են տեր կանգնել տաղանդավոր դերասանուհու, հայ հանճարեղ արտիստի՝ Մհեր Մկրտչյանի առաջին տիկնոջ Դոնարա Մկրտչյանի լքված շիրմին ու շիրմաքար դնել:
«Օրեր առաջ Facebook սոցիալական ցանցի օգտատերերից Լիլիթ Ումրշատյանը տարածել էր հայ բեմի եւ կինոյի ամենապայծառ դեմքերից մեկի, տաղանդավոր դերասանուհու, հայ կինոյում եւ թատրոնում բազում անկրկնելի կերպարներ կերտած արտիստուհու, հայ հանճարեղ արտիստի՝ Մհեր Մկրտչյանի առաջին տիկնոջ, Դոնարա Մկրտչյանի լքված շիրիմի լուսանկարը: Շնորհակալություն հայտնելով Լիլիթին խնդիրը բարձրացնելու համար, webtv.am առաջին հայկական մշակութային ինտերնետ հեռուստատեսության թիմը նախաձեռնում է Դոնարա Մկրտչյանի շիրիմի ամբողջական բարեկարգումը եւ շիրմաքարի տեղադրումը, որին վստահ ենք, կաջակցեն մեր շատ հայրենակիցներ Հայաստանից եւ սփյուռքից, գործարարներ, արվեստի եւ մշակույթի ճշմարիտ նվիրյալներ: Մեր ներկայացուցիչներն արդեն եղել են գերեզմանատանը, փաստաթղթային ճշգրտումներով համոզվել, որ լքված գերեզմանոցում թաղված է Դոնարա Մկրտչյանը, գերեզմանատան տնօրինության հետ քննարկել են Դոնարա Մկրտչյանի գերեզմանոցի ամբողջական բարեկարգման եւ շիրմաքարի տեղադրման մոտավոր ծախսերը, որը կկազմի մոտ 2.500.000 ՀՀ դրամ:
Բանակցություններ են տարվել նաեւ մեր լավագույն արվեստագետներից ոմանց հետ՝ Դոնարա Մկրտչյանի հուշաքարը նախագծելու խնդրով: Համապատասխան գումարը հավաքագրելուց հետո, անպայման, կհայտարարվի դրա մասին եւ անմիջապես կսկսվի աշխատանքների իրագործումը:
Բարերարների ցանկության դեպքում նրանց անունները կթողնվեն փոքրիկ հուշատախտակի վրա: Դերասանուհու շիրիմն ամբողջությամբ բարեկարգելուց հետո կկատարվի համապատասխան արարողություն: Դոնարա Մկրտչյանը ոչ միայն կարճ արտիստական կյանք ապրած ու հայ մշակույթի մեջ առանձնացած դերասանուհի է, ոչ միայն բազմաթիվ տաղանդավոր կերպարներ է կերտել հայ կինոյում ու թատրոնում, այլ նաեւ հայ հանճարներից Մհեր Մկրտչյանի առաջին կինն է, ով իր կյանքի գրեթե քսան տարին անցկացրեց Սեւանի հոգեբուժարանում եւ մահացավ՝ անտեղյակ լինելով իր ընտանիքի դաժան ճակատագրի պատմությանը»,-հայտնեց պարոն Մանուկյանը:
Կարդացեք նաև
Հաշիվը բացված է Զարգացման Հայկական բանկում:
Հաշվեհամարներն են՝
ՀՀ դրամով՝ 1810004369880400 , ԱՄՆ դոլարով՝ 1810004369880101, Եվրոյով՝ 1810004369880150, ՌԴ ռուբլով՝ 1810004369880158
Webtv.am Հեռ. 091 27 07 76
Գոհար ՀԱԿՈԲՅԱՆ
