Ադրբեջանում գերության մեջ հայտնված զինծառայող Հակոբ Ինջիղուլյանի հարազատները ադրբեջանական լրատվամիջոցին տված հարցազրույցի ժամանակ չեն ճանաչել իրենց Հակոբին:
«Ինքը շատ վախեցած, ընկճված էր, վատ էր, անճանաչելի: Ոնց որ ուզում էր թաքցնել վախը, բայց չէր կարողանում»,- Aravot.am-ին պատմեց Հակոբի հորեղբոր տղան` Արման Ինջիղուլյանը:
Նա ասաց, որ իրենց տպավորությամբ, եղբոր նկատմամբ այնտեղ բռնություններ են կիրառվել. «Համազգեստի թեւերը պետք է ծալված լինեին, բայց հարցազրույցի ժամանակ թեւերը ծալված չէին, ամբողջությամբ փակ էին, կարճաթեւով չէր: Հենց դա էլ կասկած է հարուցել, որ, ամենայն հավանականությամբ, ամբողջ մարմնին կապտուկներ կան: Աչքի տակի կապտուկն էլ է, կարծում եմ այնտեղ արվել, տեսանյութում երեւում էր, բայց ակնհայտ էր նաեւ, որ լավ գրիմ էին արել: Ու բացի դա, այդ ամենը շոու էր, ու երեխեն ստիպված խոսում էր»:
Տեսանյութում գերեվարված զինծառայողը պատմում էր, որ զորամասում հրամանատարի հետ խնդիրներ է ունեցել, վերջինս հարվածել է աչքին: Արման Ինջիղուլյանից հետաքրքրվեցինք, իրենք ե՞րբ են վերջին անգամ Հակոբի հետ խոսել եւ արդյոք Հակոբը պատմե՞լ էր իր եւ հրամանատարի հետ ունեցած խնդիրների մասին. «Դեպքից մի օր առաջ Հակոբի հարազատ եղբայրն է հետը խոսել, Հակոբն ասել է` ամեն ինչ լավ է, ծառայությունը նորմալ է անցնում ու հաջորդ օրը նրան պետք է տանեին դիրքեր: Ինձ թվում է` հրամանատարի հետ խնդիրներ չկան, ուղղակի բան էր, ասաց, ստիպել էին, ասում էր: Ադրբեջանական սահմանին ոչ թե ինքն էր հայտնվել, այլ առեւանգել էին, տարել»:
Կարդացեք նաև
Հակոբ Ինջիղուլյանը մեկ տարի 2 ամսվա զինծառայող է, ու Արման Ինջիղուլյանի խոսքերով, «Եթե խնդիր ունենար, ոչ թե կգնար Ադրբեջան, այլ կգար Երեւան»:
Նա, հաշվի առնելով նախորդ դեպքը, երբ Ադրբեջանում գերեւարված հովիվը հարցազրույցից հետո ինքնասպան եղավ, մտավախություն ունի նույն սցենարի կրկնության մասին. «Վախ է ներշնչում: Մարդիկ են եղել, որ գերի ընկնելուց հետո հետ են եկել ու 15 օր հետո ինքնասպան են եղել»:
Նա նաեւ դժգոհեց Կարմիր խաչի միջազգային կոմիտեի աշխատանքից. «Պաշտպանության նախարարությունն ամեն ինչ անում է, բայց Կարմիր խաչը դեռ սպասում է, բայց կարծում եմ` կարող էր ստիպել, որ գործընթացն արագացված կարգով լիներ»:
Իրենց դժգոհությունը Կարմիր խաչի աշխատանքից հայտնելու համար էլ, այսօր Հակոբի հարազատները Կարմիր խաչի երեւանյան գրասենյակի դիմաց բողոքի ակցիա են անցկացրել:
Արփինե ՍԻՄՈՆՅԱՆ
