Վերջին օրերին Տավուշի մարզի հատվածում՝ հայ-ադրբեջանական շփման գծում իրավիճակը լարված է: Օգոստոսի առաջին տասնօրյակում Ադրբեջանի կողմից հրադադարի ռեժիմի խախտման հետևանքով 4 հայ զինծառայող վիրավորվել էր, զոհեր կան ադրբեջանական կողմից:
Aravot.am-ը «Ժառանգություն» կուսակցության մամուլի քարտուղար Հովսեփ Խուրշուդյանից հետաքրքրվեց՝ շփման գծում միջադեպերը արդյոք խոսո՞ւմ են նոր լարվածության հասունացման մասին: Պարոն Խուրշուդյանը պատասխանեց. «Չի կարելի բացառել, որ այդ լարվածությունը կապված է Ադրբեջանի նախագահական ընտրությունների հետ, իրենց՝ ադրբեջանական հռետորաբանությունն ավելի ամրապնդելու, ինչպես նաև եվրաինտեգրման գործընթացներին խոչընդոտելու ինչ-ինչ ուժերի ցանկության հետ: Հայկական կողմի պատասխանը պիտի համարժեք լինի: Ամեն դեպքում իրավիճակը մտահոգիչ է, քանի որ այդ ամենի արդյունքում կարող են նոր զոհեր լինել: Մենք միշտ նշել ենք, որ այսօրվա վիճակը արդյունք է մեր իշխանությունների անհետևողական քաղաքականության, ազգային շահերը չհետապնդելու և սեփական իշխանությունը երկարաձգելու ուղղությամբ:
Միջազգային հանրությունը ևս կիրառում է երկակի ստանդարտներ. դա վերաբերում է համանախագահող երկրներին նաև, երբ փորձ է արվում երկու կողմերին դնել նույն հարթության վրա՝ չնայած հրադադարի խախտողը միշտ ադրբեջանական կողմն է»:
Կարդացեք նաև
ԱԺ ՀՀԿ խմբակցության քարտուղար Հովհաննես Սահակյանը նույն հարցի կապակցությամբ մեզ հետ զրույցում նշեց սահմանային միջադեպերի գոյության մի քանի պատճառներ. «Սադրանքը ադրբեջանական կողմից է: Ալիևը պիտի իր կլանով վերականգնվի և վերարտադրվի, ու նախորդ երկու ընտրություններում իր հիմնական խաղաքարտը ղարաբաղյան հակամարտությունն էր, հարցի ռազմական ճանապարհով կարգավորումը: Իրենց ամենամեծ զորավարժությունը՝ շքերթը, դրա վառ ապացույցն էր, թե իրենք ուժեղ են, իրենց բանակն այդքան զենք ունի: Ալիևի մյուս խնդիրը նավթադոլարները լեգիտիմացնելն է, որ ժողովուրդը տեսնի, որ այսքան նավթից ստացած գումարը բանակի վրա են ծախսում»:
Պարոն Սահակյանը ադրբեջանական կողմին կոչ արեց աչքերն ավելի լայն բացել ու հավելեց. «Իրենք և մենք առնվազն վստահ ենք, որ եթե վայրկյան անգամ իրենք այդ կարողությունն ունենան, որ ռազմական ճանապարհով հակամարտությունը լուծեն, իրենք դա կանեն: Սակայն Ալիևի լեգիտիմությունն ու ժողովրդի մեջ նրա նկատմամբ վստահությունն այնքան ցածր է, որ նմանատիպ ցանկացած գործողության ժամանակ թեկուզ աշխարհի ամենահզոր զենք-զինամթերքին տիրապետեն, պարտվելու են:
Մյուս կողմից էլ՝ գլոբալիզացման ակտիվ փուլում փորձում են որոշակի խնդիրներ լուծել: Բազմիցս հայտարարությունների և քայլերի տեսքով փորձում են ներգրավվել ղարաբաղյան կարգավորման գործընթացի մեջ: Սակայն աշխարհը, այն գերտերությունները, որ զբաղվում են այդ խնդրով, բազմիցս նշել են, որ խնդրի կարգավորման ֆորմատը Մինսկի համանախագահների ֆորմատն է՝ խաղաղ կարգավորման ֆորմատը, որը մեզ համար ընդունելի է: Բայց հրահրված որևէ պատերազմ անպատասխան չի մնա»:
Հովհաննես Սահակյանը փաստեց, որ մենք որևէ անգամ չենք հրահրել ու չենք հրահրելու պատերազմ և որևէ քայլ չենք կատարում, որը կտանի նրան, որ սահմանում լինի ակտիվություն ու սադրանք: Ու որպես ապացույց նշեց այն, որ հայկական կողմը եկավ համաձայնության, որ դիպուկահարները շփման գծից հետ քաշվեն, իսկ Ադրբեջանը նույնիսկ իր խոսքն ու ստորագրությունը չպաշտպանեց:
Մեր հարցին՝ սահմանային վերջին միջադեպերը վկայո՞ւմ են այն մասին, որ նոր լարվածություն է հասունանում, պարոն Սահակյանն այսպես պատասխանեց. «Այն լարվածությունը, որ ադրբեջանական կողմն է պարտադրում սահմանում, բոլորն են տեսնում: Լարվածությանը մենք տալիս ենք արժանի հակահարված, որ իրենք էլ հասկանան, որ այդպիսի սադրանքով 21-րդ դարում երկար առաջ չես գնա»:
Տաթև ՀԱՐՈՒԹՅՈՒՆՅԱՆ
Այ ՀՀԿ-ականներ, ընտրություններ կեղծելիս առաջինն եք, իսկ պատերազմի ժամանակ հույսներդ դրել եք որ Ալիևին միջազգային ատյանները կպատժեն, կամ էլ կհավաքվեք ու առնետների նման կփախչեք մեր Հայաստանից: Ու շատ լավ կլիներ որ օր առաջ փախչեիք մեր հայրենիքն էլ ազատվեր ձեզանից: Ամեն մեկդ դարձել եք սուտ հռետոր, բայց ոչ երկրի ներսում եք մի բան, ոչ էլ դրսում / ուր են մեծախոս Աշոտյանը, Ավագյանը և սրանց նման մյուսները, այ ………………../: Մեր երեխեքը զոհվեն, իսկ դուք շարունակեք լափել: