Azatutyun. am. ԱՄՆ-ի դաշնային դատարանը վճռել է, որ Նյու Յորքի ոստիկանական դեպարտամենտի կիրառած «կանգնեցրու և խուզարկիր» գործելաոճը խախտում է մարդու իրավունքները:
Ըստ դատարանի՝ ոստիկանությունը այդ քաղաքականությամբ անհամաչափ գործողություններ է իրականացնում, մասնավորապես, աֆրոամերիկացիների և լատինամերիկյան ազգերի նկատմամբ:
Դատավորը մշտադիտարկում է նշանակել՝ հետևելու համար ոստիկանների հետագա գործողություններին:
«Կանգնեցրու և խուզարկիր» գործողությունների ընթացքում ոստիկանները զենք կամ թմրամիջոցներ պահելու կասկածանքով կանգնեցնում են քաղաքացիներին և խուզարկում: Այդ գործողությունների դեմ բողոքը ներկայացրել են չորս անձինք, ովքեր հայտարարել են, որ իրավապահներն իրենց ապօրինի կերպով հետապնդել են:
