Այս օրերին վերանորոգվում է «Սուրբ Սարգիս» եկեղեցու հարեւանությամբ գտնվող գետնանցումը, որը սպասարկում է Գրիգոր Լուսավորիչ, Մաշտոցի պողոտա փողոցները: Գետնանցումի որոշ հատվածներ, բարեկարգման աշխատանքներով պայմանավորված, խիստ վտանգավոր են դարձել անցորդների համար: Մասնավորապես, Մաշտոցի պողոտայի` «Փակ շուկայի» ուղղությամբ, անցումի մուտքին երկաթներ ու քարեր են կախված, որոնք հասնում են մինչեւ գետնին: Բարեկարգվող հատվածները պաստառով առանձնացված չեն, վտանգի մասին նախազգուշացնող որեւէ ցուցանակ էլ բարեկարգող ընկերությունը չի դրել: Անցումի այդ հատվածը ուշ ժամերին չի լուսավորվում: Եթե ցերեկային ժամերին վտանգը քիչ թե շատ տեսանելի է ու մարդիկ շրջանցում են ժանգոտ երկաթները, ապա, ուշ երեկոյան, փողոցի լույսերն էլ մարելու դեպքում, վտանգն անխուսափելի է. անցորդները կբախվեն ցցված երկաթներին ու կախված քարերին:
Aravot.am-ը Երեւանի քաղաքապետարանից հետաքրքրվեց, թե ո՞ր ընկերությունն է ստանձնել գետնանցումի վերանորոգման աշխատանքները: Հարցրել էինք նաեւ, թե անցման այն հատվածները, որոնք մարդկանց համար վտանգ են ներկայացնում, ինչո՞ւ գոնե մասամբ չեն պաստառապատվում, կամ ինչո՞ւ նախազգուշացնող նշաններ չեն դրվում:
Քաղաքապետարանի շինարարության եւ բարեկարգման վարչությունից մեր հարցերին ի պատասխան փոխանցեցին, որ նշյալ գետնանցումի բարեկարգումն իրականացնում է «Վիտեք» ընկերությունը եւ որ առանց զգուշացնող նշանների աշխատանքներ կատարելը շինարար-կառուցապատողի բացթողումն է:
«Հենց հիմա զանգեցին կառուցապատողին եւ զգուշացրեցին, որ նշանները տեղադրեն»,-հայտնեցին քաղաքապետարանից:
Կարդացեք նաև
Լուսինե ԲՈՒԴԱՂՅԱՆ
