«Ազատություն» ռադիոկայան. Վլադիմիր Պուտինը Բաքու կժամանի վաղը կեսօրին՝ Ռուսաստանի կառավարության միանգամից վեց նախարարների, այդ թվում՝ պաշտպանության նախարար Սերգեյ Շոյգուի և արտգործնախարար Սերգեյ Լավրովի ուղեկցությամբ:
Պուտինին աշխատանքային այս այցի շրջանակներում կուղեկցեն նաև ռուսական զենքի վաճառքի մենաշնորհային իրավունքներով օժտված “РосОборонЭкспорт” կոնցեռնի ղեկավար Անատոլի Իսայկինը, ինչպես նաև էներգետիկայի, տնտեսական զարգացման, արտակարգ իրավիճակների նախարարները:
Բանակցությունների ընթացքում կողմերը լրջորեն քննարկելու են նաև էներգետիկ համագործակցության խորացման հարցը: Ուստի պատահական չէ, որ Վլադիմիր Պուտինի ղեկավարած պատվիրակության կազմում են ռուսաստանյան երկու ամենախոշոր նավթային ընկերությունների` “Роснефть”-ի և LUKOIL-ի նախագահները` Իգոր Սեչինն ու Վագիթ Ալեքփերովը:
Մոսկվացի լրագրողների հետ զրույցում Ռուսաստանի նախագահի օգնական Յուրի Ուշակովը այսօր նշել է. – «Ռուսական պատվիրակության կազմն արդեն իսկ վկայում է, որ գործնականում քննարկվելու է երկկողմ հարաբերություններին վերաբերող հարցերի ողջ սպեկտրը»:
Կարդացեք նաև
Ուշակովի տեղեկություններով՝ ռուս – ադրբեջանական բանակցությունների ավարտին մի շարք երկկողմ համաձայնագրեր կստորագրվեն տրանսպորտի և էներգետիկայի ոլորտում, իսկ երկու երկրների արտակարգ իրավիճակների նախարարությունները համաձայնագիր կստորագրեն՝ նվիրված համագործակցության համալիր միջոցառումների իրականացմանը:
Ուշակովի խոսքով՝ Իլհամ Ալիևն ու Վլադիմիր Պուտինը բանակցությունների ժամանակ քննարկելու են տարածաշրջանային և միջազգային քաղաքականության առանցքային թեմաները, այդ թվում՝ Լեռնային Ղարաբաղի խնդրի կարգավորումն ու Կասպից ծովի կարգավիճակի հստակեցումը:
Ի դեպ, լրատվամիջոցներում նախապես տեղեկություններ էին հայտնվել, որոնց համաձայն՝ Պուտինը տասնյակ պաշտոնյաների, գործարարների ու լրագրողների ուղեկցությամբ Բաքու կժամանի Աստրախանից` ծովային ուղով: Այդ նույն տեղեկությունների համաձայն՝ Պուտինը պետք է Բաքու ժամաներ Ռուսաստանի ռազմածովային ուժերի Կասպիական նավատորմիղի կազմում ընդգրկված «Դաղստան» ռազմանավով: Այսօր սակայն՝ այցի նախօրեին, ռուսական պաշտոնական աղբյուրները Կրեմլի ղեկավարի ծովային այցելության մասին դեռևս որևէ տեղեկություն չեն հաղորդում, նշելով միայն, որ նախագահի այցը համընկնում է «Դաղստան» և «Վոլգոդոնսկ» ռազմավանավերի Ադրբեջան բարեկամական այցին: «Իլհամ Ալիևն ու Վլադիմիր Պուտինը այցի շրջանակներում կայցելեն այդ ռազմանավեր», – տեղեկացնում է ռուսաստանյան «Նովոստի» լրատվական գործակալությունը:
Ի դեպ, ռուս – ադրբեջանական բանակցությունների հիմնական մասն ընթանալու է ոչ թե ադրբեջանական մայրաքաղաքում, այլ Բաքվից 200 կիլոմետր հեռավորության վրա գտնվող Գաբալա հանգստավայրում: «Այստեղ բարձրաստիճան հյուրերի համար հատուկ ընդունելությունների տուն է կառուցվել, որտեղ էլ կընթանան նախագահների բանակցությունները», – հաղորդում է «Թուրան» գործակալությունը:
Չնայած բանակցությունների վայրի ընտրությանը` Գաբալայի ռադիոլոկացիոն կայանի ճակատագիրը նախագահների բանակցության օրակարգում ընդգրկված չէ:
