Այսօր՝ օգոստոսի 11-ին, ավտովթար է տեղի ունեցել Արարատի մարզում: Վթարի վայրից ֆոտոլրագող Գագիկ Շամշյանը shamshyan.com-ին ասել է, որ ժամը 07:30-ի սահմաններում Ջերմուկ քաղաքի բնակիչ, 27-ամյա Ալիկ Ավետյանը, վարելով ГАЗель 2705 մակնիշի 906 ՕՕ 63 համարանիշի ավտոմեքենան, Երեւան-Երասխ ավտոճանապարհի 43-րդ կմ հատվածում դեպի Երեւան ընթանալիս դուրս է եկել ճանապարհի երթեւեկելի գոտուց, բախվել ճանապարհի բաժանարար գոտում տեղադրված բետոնե եւ երկաթյա արգելապատնեշներին ու հարվածել գովազդային վահանակին:
Դեպքի վայր ժամանած ՀՀ Արտակարգ իրավիճակների նախարարության փրկարար ծառայության Արարատի հրշեջ-փրկարարական ջոկատի փրկարարները քաղաքացիների օգնությամբ ավտոմեքենայից դուրս են բերել վարորդին եւ վիրավոր ուղեւորին, ովքեր տեղափոխվել են Արտաշատի բժշկական կենտրոն: Ֆոտոլրագրողը հայտնում է, որ հիվանդանոցում Ա. Ավետյանը մահացել է, իսկ ուղեւոր՝ Երեւանի բնակիչ, 28-ամյա Էդգար Հարությունյանը կայուն ծանր վիճակում գտնվում է բժիշկների հսկողության տակ: Դեպքի վայր են ժամանել նաեւ ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները, ոստիկանության Արարատի բաժնի օպերատիվ խումբը: Փաստի առթիվ հարուցվել է քրեական գործ՝ ՀՀ քր.օրի 242 հոդվածի 2-րդ մասի հատկանիշներով: Ըստ տեղեկությունների՝ նշված ավտոմեքենան պատկանում է «Օլիպ-Սանտ» ՍՊԸ-ին, եւ վարորդն ու ուղեւորը, ըստ դեպքի վայրում հավաքվածների տեղեկությունների, վերադառնում էին Արցախից:
