«Ցավոք, շինարարության ոլորտի` հատկապես մասնավոր հատվածի նախորդ տարվա ցուցանիշները համեստ են, ուստի կառավարությունը ոլորտի պատասխանատուների առաջ խնդիր է դրել՝ շինարարության ոլորտում ապահովել տնտեսական աճի ցուցանիշը, որին հասնելու համար կառավարությունը պատրաստակամություն է հայտնել պետական ծրագրերով սատարել ոլորտին»,-այսօր «Գոլդեն փելես» հյուրանոցում Շինարարի օրվա առիթով կազմակերպված միջոցառման ժամանակ ասաց ՀՀ քաղաքաշինության նախարար Սամվել Թադեւոսյանը:
Շինարարներին շնորհավորելու եկած ՀՀ վարչապետ Տիգրան Սարգսյանն էլ պատվոգրեր, շնորհակալագրեր ու մեդալներ հանձնեց իրենց գործով աչքի ընկած շինարարներին: Մի քանի վաստակավոր շինարարներ նույնպես պարգեւատրվեցին: Քաղաքաշինության փոխնախարարներ Ռուզան Ալավերդյանը եւ Ալեքսան Կարապետյանը նույնպես պարգեւների արժանացան:
Նախարար Թադեւոսյանը վստահեցրեց, որ Հայաստանի շինարարությունը համաշխարհային զարգացումներից հետ չի մնում, մեր շինարարության մեջ նույնպես օգտագործվում են ամենաառաջավոր տեխնիկան, ճարտարապետական միտքը եւ այլն:
Aravot.am-ը Ճարտարապետների միության նախագահ Մկրտիչ Մինասյանից հետաքրքրվեց, թե ինչպե՞ս կգնահատի ներկայումս հանրապետության ճարտարապետության վիճակը: Եվ արդյոք անհրաժե՞շտ էր Ճարտարապետության պետական կոմիտեի հիմնումը:
Կարդացեք նաև
Պարոն Մինասյանի համոզմամբ, այսօրվա շինարարությունը կախված է մեծ ներդրումներից եւ կայուն վիճակից. «Երկրում պետք է խաղաղության վիճակ լինի, մթնոլորտը պետք է փոխվի, մնացածն արդեն ամեն ինչ կլինի, որովհետեւ մենք ի վիճակի ենք լուծելու ե’ւ շինարարական, ե’ւ ճարտարապետական հարցերը, բայց դրանք այսօրվա պայմաններում ահռելի գումարներ են պահանջում»:
Իսկ թե պե՞տք էր այդպիսի կոմիտե մեր երկրին. Մկրտիչ Մինասյանն ասաց` «Եթե կառավարությունը գտել է նպատակահարմար, որ պետք է լինի Ճարտարապետության պետական կոմիտե, ինչպես ասում են` կապրենք` կտեսնենք»:
Ճարտարապետների միության նախագահի մեկնաբանություններն առավել մանրամասն` տեսանյութում
Շինարարության ոլորտում երկարամյա աշխատած Աշոտ Ջավախյանն էլ, որը նաեւ Ալավերդու պղնձամոլիբդենային կոմբինատի շինարարն է եղել, գտնում էր, որ Երեւանում չպետք է լինեն այդքան շատ բարձր հարկեր ունեցող շենքեր` նկատի ունենալով, որ ե’ւ մայրաքաղաքի տեսքն է աղավաղվում, ե’ւ աշխարհագրորեն երկրաշարժի գոտում է Երեւանը գտնվում:
Շինարար Ջավախյանի զրույցի մանրամասները` տեսանյութում
Լուսինե ԲՈՒԴԱՂՅԱՆ
Ֆինանսների նման սուղ պայմաններում այնքան էլ հիմնավորված չէ կառավարման այնպիսի օղակի ստեղծումը, որի գործառույթները իրականացվում են այլ կառավարման օղակների կողմից: Կստացվեն ավելորդ կրկնություններ և ֆինանսների չհիմնավորված շռայլում: