«Ծրագրի միջոցով կփորձենք ավելի շատ ինֆորմացիա տալ աշակերտներին: Մասնագիտական կողմնորոշման եռօրյա դասընթացին կմասնակցի ավագ դպրոցների շուրջ 30 աշակերտ, ովքեր կկարողանան ինֆորմացիան տեղ հասցնել»,-այսօր Aravot.am-ի հետ զրույցում Մասնագիտական կողմնորոշումն ավագ դպրոցներում ծրագրի մասին նշեց Հայաստանի երիտասարդական հիմնադրամի համակարգող Կարեն Ավագյանը:
Նրա խոսքով այսօր ընտանիքի անդամներն են որոշում իրենց երեխաների մասնագիտությունը եւ դա բերում է որոշակի խնդիրների, քանի որ շատերը չեն ընտրում այն ինչ իրենք իսկապես ցանկանում են: Մեր ուսանողները սովորում են մի բան, որը չեն ուզում: Անհրաժեշտ է ինքնուրույն կողմնորոշվել: Դիմելով աշակերտներին պրն. Ավագյանը նշեց, որ նրանք սեփական հմտություններն ավելի լավ գիտեն:
Գերմանական խորհրդատվական կենտրոնի ղեկավար Մերի Մուրադյանի պնդմամբ իրենց նպատակն է հատուկ մասնագիտական թեստերի միջոցով պարզել աշակերտների ունակությունները.
«Ցանկանում ենք երեխաների մոտ մասնագիտական կողմնորոշման հստակություն ավելացնել: Նրանք ընտրում են այն մասնագիտությունները, որոնք ընտանեկան են, կամ նորաձեւ: Հատուկ մասնագիտական թեստերի միջոցով կբացահայտենք իրենց թույլ եւ ուժեղ կողմերը»:
Կարդացեք նաև
Սեմինարի նպատակն է աջակցել հանրապետության ավագ դպրոցների աշակերտներին ավելի լավ կողմնորոշվել ապագա մասնագիտության ընտրության հարցում: Սեմինարի ընթացքում Գերմանական խորհրդատվական կենտրոնի` մասնագիտական կողմնորոշման ոլորտում վերապատրաստված մասնագետներն աշակերտներին կծանոթացնեն մասնագիտական կողմնորոշման առանձնահատկություններին, բուհերի մասնագիտությունների ցանկին:
Անժելա ՇԱՀՈՒՄՅԱՆ
