ՀՀ Ոստիկանությունը հրաժարվել է ապրիլի 9-ին Բաղրամյան փողոցից մի խումբ ակտիվիստների ձերբակալություններից հետո նրանց վարչական տույժի ենթարկելու մասին դատարան ներկայացրած հայցից: Բայց այդ օրը Ոստիկանություն տարված մոտ 18 ակտիվիստներից ոչ բոլորին են այդ մասին գրավոր տեղեկացրել:
«Ոստիկաններն ի՞նչ պետք է ապացուցեն: Մենք փաստեր ունենք, ամեն ինչ նկարվել է, որ ոստիկանները մեզ ոչ մի բան չեն խնդրել, Օսիպյանը գալիս ու առանց ասելու տանում է մեզ բաժին: Վարդգեսն էլ` իմ ընկերը, ամբողջ փաստերը ներկայացրել է: Հիմա անիմաստ ժամանակի ձգձգոց է, վարչական դատարանն էլ լավ ծանրաբեռնված է , երեւի չուզեցին անիմաստ ժամանակ անցկացնել, դրա համար մի քայլ նահանջեցին»,- ասաց Եղիա Ներսիսյանը:
Ի դեպ, նա դեռ վարչական տույժի չենթարկվելու հայցի հետ վերցման վերաբերյալ համապատասխան գրություն չի ստացել: Նրա խոսքերով. «Ամեն դեպքում անլրջություն է ոստիկանության կողմից: Երբ մարդուն բերման են ենթարկում, պետք է հիմնավոր պատճառներ ունենան, ոչ թե տանեն, որովհետեւ ինչ-որ մեկը ակտիվ է ու գոռգոռում է: Բայց մեր ոստիկանությունը դեռ այդպես է գործում, չի հիմնավորում, դնում են, մեքենան տանում: Հետո էլ փորձում են ինչ-որ գործ սարքել ակտիվիստների վրա»:
Արփինե ՍԻՄՈՆՅԱՆ
