Ըստ ճարտարապետ, քաղաքաշինարար Սարհատ Պետրոսյանի, պետական համակարգում առաջխաղացում ունենալու համար արդեն նախկին գլխավոր ճարտարապետ Նարեկ Սարգսյանին օգնեց հենց նրա հասցեին ուղղված քննադատությունը: Նրա խոսքերով, հանրային լայն շերտերի դժգոհությունը պատճառ դարձավ ոչ թե համակարգից նրա հեռացմանը, այլ նպաստեց պաշտոնի բարձրացմանը:
«Քննադատությունն օգնում է այդ անձնավորությանը պետական համակարգում առաջխաղացում ունենալու համար: Կարելի է ասել նա պարգեւատրվեց, որովհետեւ այն ժամանակ, եթե ինքը եւ իր խունտան Երեւանում էին իրենց լավ զգում, հիմա ամբողջ հանրապետությունում են լավ զգալու:
Դեռ վաղ է խոսել, կառավարությանն առընթեր ճարտարապետության պետական կոմիտեում ինչ է անելու Նարեկ Սարգսյանը, որովհետեւ չգիտենք՝ այդ կոմիտեն ինչով է զբաղվելու եւ ինչ հնարավորություններ է ունենալու: Բայց մի բան պարզ է՝ սա ցույց է տալիս, որ պետական կառավարման համակարգը թքած ունի մասնագիտական ու հանրային կարծիքի վրա: Եվ այն բոլոր խնդիրները, որոնք բարձրաձայնվում են՝ զրոյական ազդեցություն են թողնում պետական կառավարման մտածողության վրա»:
Սարհատ Պետրոսյանը դրական կարծիք հայտնեց նոր գլխավոր ճարտարապետի թեկնածու Տիգրան Բարսեղյանի մասին. «Նա վերջին տասնհինգ տարվա ընթացքում առաջին գլխավոր ճարտարապետն է լինելու , որը մինչեւ գլխավոր ճարտարապետ լինելը նախագծման աշխատանքներով զբաղվել է: Նարեկ Սարգսյանը մինչեւ գլխավոր ճարտարապետ լինելը ճարտարապետությամբ չէր զբաղվում եւ գլխավոր ճարտարապետի պաշտոնը նրան նախագծմամբ զբաղվելու հնարավորություն էր: Եթե Բարսեղյանն ընտրվի գլխավոր ճարտարապետ, գործ կունենանք պրոֆեսիոնալ ճարտարապետի հետ:
Կարդացեք նաև
Բայց պետք է հասկանանք՝ ինչներիս է պետք այս բարդ համակարգը՝ սկսած գլխավոր ճարտարապետից վերջացրած ճարտարապետության պետական կոմիտեով, որը մինչ այս քաղաքաշինության ոլորտում ընդունված որոշումներից ավելի անիմաստ: Նման կոմիտե կար Խորհրդային միությունում, երբ այլ իրավիճակ էր: Փաստորեն մեզ մոտ գերիշխող է դառնում սովետական մտածողությունը, ինչը ողբալի է»:
Արփինե ՍԻՄՈՆՅԱՆ
