Aravot.am-ի տեղեկություններով, սեպտեմբերի 9-ին Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Ռուբիկ Ափինյանի նախագահությամբ կսկսվի Հովհաննես Գևորգյանի հայցի քննությունը «Հայաստանի «Տկզար» պետական նվագախումբ» ՊՈԱԿ-ի դեմ: Հայցվորը պահանջում է վերականգնել իրեն աշխատանքում, բռնագանձել հարկադիր պարապուրդի դիմաց, եւ անվավեր ճանաչել աշխատանքային պայմանագրի մի կետը:
Նշենք, որ Կենտրոն և Նորք-Մարաշ վարչական շրջանների ընդհանուր իրավասության դատարանի դեռ անցյալ տարվա հունվարի 9-ի որոշմամբ հայցադիմումն ընդունվել էր վարույթ, հրավիրվել էին նախնական դատական մի քանի նիստեր:
Պատասխանող «Տկզար» նվագախմբին հնարավոր չէր եղել պատշաճ կարգով ծանուցել դատական նիստերի ժամանակի և վայրի մասին, քանի որ հայցվորի կողմից ներկայացված հասցեներով ուղարկված փաստաթղթերը, ծանուցումը վերադարձվել էին դատարան: Նշվել է հասցեն՝ Տերյան-72-ը:
Կենտրոն և Նորք-Մարաշ վարչական շրջանների ընդհանուր իրավասության դատարանի անցյալ տարվա օգոստոսի 24-ի որոշմամբ հայտարարվել էր ժողովրդական «Տկզար» նվագախմբի հետախուզում, իսկ գործի վարույթն էլ այդ իսկ պատճառով կասեցվել էր:
Այս տարվա մայիսի 22-ին դատարանի գրասենյակ կրկին մուտքագրվել էր Հովհաննես Գեւորգյանի դիմումը. պետական նվագախումբը «հայտնաբերվել» էր, հետախուզումն ավարտվել է: Հայցվորը խնդրել էր վերսկսել գործի կասեցված վարույթը: Մինչ օրս երեք նախնական դատական նիստ է տեղի ունեցել, գործը նախապատրաստվել է դատաքննության:
Ռուզան ՄԻՆԱՍՅԱՆ
