Հոկտեմբերի 9-ին Ադրբեջանում սպասվում են նախագահական ընտրություններ, որով Հարավային Կովկասի երկրներում ավարտվում են բոլոր տեսակի համապետական ընտրությունները: Թե ինչպիսի ընտրություններ են սպասվում Ադրբեջանում, եւ ինչպիսի գնահատանքի կարող են արժանանալ «արդար ու դեմոկրատ» եվրոպացիների կողմից, քաղաքագետ Գագիկ Համբարյանը բերում է տիպիկ մի օրինակ. «Բրիտանիայում ադրբեջանական դեմոկրատական ասոցացիայի ղեկավար Մուրադ Հասանլին եվրոպացի ճանաչված քաղաքական գործիչների ու գործարարների հետ (որոնք շահեր ունեն Ադրբեջանում) զրույցում փորձել է համոզել, որ Ադրբեջանում իշխանափոխության դեպքում նոր դեմոկրատական կառավարությունը կշարունակի նախորդների կողմից ստանձնած պարտականությունները: Ի պատասխան ադրբեջանցու՝ նրանցից մի քանիսը քմծիծաղով պատասխանել են` «մենք Ադրբեջանի հետ ոչ մի պայմանագիր չենք ստորագրել, մենք գործարք ենք կնքել Ալիեւի հետ»:
