Azatutyun.amԱնցած շաբաթ մոսկովյան շուկաներից մեկում տեղի ունեցած միջադեպից հետո, երբ դաղստանցի առևտրականը հարձակվել էր ոստիկանի վրա, Ռուսաստանում միգրանտների դեմ իսկական արշավ է սկսվել:
Ռուսաստանի իշխանությունները հայտարարել են, որ ստեղծելու են միգրացիոն ճամբարներ երկրի բոլոր մարզերում: Մոսկվայի արևելքում նման ճամբար արդեն գործում է:
Տասը օր ճամբարում մնալուց հետո միգրանտներին Ռուսաստանի իշխանությունները պետք է վտարեն երկրից, ընդ որում՝ Ռուսաստանի հաշվին:
Փորձագետներն ու իրավապաշտպանները քննադատում են այս ծրագիրը, ասում են, որ, օրինակ, Մոսկվայի արևելքում՝ Գոլյանովոյում ստեղծված ճամբարում չկան ապրելու համար տարրական պայմաններ:
Կարդացեք նաև
Միգրացիոն ծառայությունների ներկայացուցիչներն էլ, իրենց հերթին, հայտարարում են, թե շատ էլ լավ պայմաններ են, նման պայմաններում աշխատանքային միգրանտները մինչ այդ երբևէ չէին ապրել, և ընդհանրապես՝ նման ճամբարները ընդունված պրակտիկա է եվրոպական բոլոր երկրներում:
Այդուհանդերձ, փորձագետները համոզված են, որ սեպտեմբերի 8-ից հետո, երբ կկայանան Մոսկվայի քաղաքապետի ընտրությունները, այս արշավը կավարտվի, և ճամբարներն էլ կվերանան:
Հայտնի փորձագետ, Կրեմլի ընդդիմախոս Ստանիսլավ Բելկովսկին ասում է, որ «իհարկե, սա կապված է Մոսկվայի քաղաքապետի ընտրությունների հետ՝ Սերգեյ Սոբյանինն ուզում է ցույց տալ, որ բոլորից լավ է կարողանում պայքարել ապօրինի միգրացիայի դեմ»:
Ծիծաղելի է, որ այս արշավի արդյունքում միգրացիոն այդ ճամբարներում վիետնամցիներն են մեծամասամբ, նշում է Բելկովսկին՝ ընդգծելով, որ վերջիններս ամենահանգիստ աշխատանքային միգրանտներն են, աշխատում են միայն՝ և ուրիշ ոչինչ:
Տարբեր աղբյուրների վկայությամբ՝ ճամբարում չկան Հայաստանի քաղաքացիներ:
