«Որեւէ նորմալ երկրում այդ հայտարարություններից մեկ փաստն անգամ բավական է, որպեսզի անմիջապես քրեական գործ հարուցվեր եւ պատժվեր այդ հանցագործությունների հեղինակը: Իսկ մեզ մոտ ակնհայտ է, որ իրավապահները սպասում են Սերժ Սարգսյանի հրահանգին: Մինչեւ նա համապատասխան ցուցում չտա՝ քրեական գործ չի հարուցվի: Առավել եւս՝ չի կալանավորվի Սուրիկ Խաչատրյանը»,- այսօր Aravot.am-ին ասաց Գորիսի՝ 1992-94թթ քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանը:
Հիշեցնենք, որ ոստիկանությունը նրան հրավիրել էր՝ զրուցելու իր կյանքի անվտանգությանը սպառնացող հայտարարության թեմայով, սակայն Սամվել Հարությունյանը հրաժարվել էր ներկայանալ՝ ասելով, որ նախ պետք է քրգործ հարուցեն Սուրիկ Խաչատրյանի դեմ եւ նրան կալանավորեն, նոր ինքը այդ հարցով կգնա բաժին:
Սամվել Հարությունյանի խոսքերով՝ «Ես էլ կոչ եմ անում, որ եթե այդպես է Հայաստանում պետական կառույցներում դրվածքը, որ նման դեպքերում պետք է գործող նախագահը հանձնարարական տա, ես պահանջում եմ, որ Սերժ Սարգսյանը այդ հանձնարարականը տա, ինչպես տվել է մի քանի այլ դեպքերում: Թող հիմա տա այդ հանձնարարականը, որպեսզի բազմաթիվ՝ հազարավոր հանցագործությունների այդ հեղինակը վերջապես կանգնի օրենքի առաջ եւ կրի քրեական պատասխանատվություն»:
Հռիփսիմե ՋԵԲԵՋՅԱՆ
Ողջ ժողովուրդը անհամբեր սպասում է այդ որոշմանը պարոն Սերժ Սարգսյան…………