Այսօր «Էրեբունի» սրահում տեղի ունեցավ սփյուռքի նախարարության «Արի տուն» ծրագրի 6-րդ փուլի բացման հանդիսավոր արարողությունը, որին մասնակցել է 120 պատանի աշխարհի 15 երկրից:
Սփյուռքի նախարարի տեղակալ Վահե Ջիլավյանի խոսքով` «Արի տուն» ծրագրի գնահատականն այն է, որ մասնակիցների թիվը տարեցտարի ավելանում է: Համահայկական ծրագրերի վարչության պետ Ատոմ Մխիթարյանը, ավանդույթի համաձայն, մասնակիցներից ամենակրտսերին` Լիբանանից Ակասիա Մարիա Ազատյանին հագցրեց «Արի տուն» ծրագրի տարբերանշանով վերնաշապիկը և գլխարկը:
Մասնակիցներին ողջունելու էին եկել 2-րդ տարին անընդմեջ հյուրընկալ ընտանիքի ներկայացուցիչ Շենգավիթ համայնքից` Վիկտորիա Մարտիրոսյանը և 6-րդ փուլում 3 սփյուռքահայ պատանի հյուրընկալած Երևանի Խ.Աբովյանի անվան թիվ 2 դպրոցի տնօրեն Իռեն Հակոբյանը:
Կարդացեք նաև
Շնորհակալական խոսքով հանդես եկավ Մոսկվայում ՀՀ դեսպանությանը կից հայկական կիրակնօրյա «Վերածնունդ» դպրոցի հայոց լեզվի ուսուցչուհի Իրինա Տարոնացին, ով Հայրենիք է բերել դպրոցի սաներից բաղկացած մի խումբ. «Հուզիչ է այն պահը, երբ արցունքն աչքերին ասում են, որ առաջին անգամ են ոտք դրել հայրենի հողի վրա»,-ասաց նա:
Բացման հանդիսավոր արարողության ընթացքում Գերմանիայից ժամանած Արփի Գույումճյանի մայրիկը` Անահիտ Հովսեփյանը, հանդես եկավ առաջարկով. «Ես շատ կցանկանայի, որ հայրենաճանաչության այս ծրագրի ընթացքում երեխաներն ինչ-որ բան անեին. ծառ տնկեին, փողոց մաքրեին: Իմ աղջկա ձեռքերն էլ փոշոտվեին այնպես, ինչպես մեր տունն ենք մաքրում»,-ասաց նա, հույս հայտնելով, որ աղջիկը շատ կհավանի Հայաստանը:
Քրիստինա ՄԻՐԶՈՅԱՆ
