Արարատի մարզի ոստիկանության բաժնում այս տարվա հուլիսից նյութեր են նախապատրաստվում Դարակերտի Դավիթ Լադոյանի անվան միջնակարգ դպրոցի մաթեմատիկայի ուսուցչուհու հետ կապված:
Լրատվամիջոցների փոխանցմամբ, 6-րդ դասարանի աշակերտ Գեւորգ Սարուխանյանը կորցրել է տեսողությունը, քանի որ ըստ նրա, մարտին, ուսուցչուհին մատանիով հարվածել է աչքին:
Ըստ նախնական տեղեկությունների, մարտին, ինչպես լրատվամիջոցներին հայտնել է երեխայի մայրը, երեխան լացելով տուն է եկել, աչքի մեջ կարմրել էր, արյուն լցվել, իսկ տակը ուռել էր. «Հարցրեցի, իմացա, բոլորն այդ ուսուցչուհու համբավը գիտեն գյուղում, նա միշտ էլ աշակերտների հետ այդկերպ է վարվել: Մտածեցի, գնամ դպրոց, որեւէ բան ասեմ, ոչ մի արդյունք չեմ ունենա, իրեն հաղթել հնարավոր չէ»:
Լրատվամիջոցները հայտնել էին նաեւ, որ «ծնողներն օրեր առաջ ստացել են որդուն զննած բժիշկ Անուշ Ղարիբյանի եզրակացությունը»:
Կարդացեք նաև
Մինչ այդ առկա է եղել Մալայանի կլինիկայի բժշկուհի Նինա Հակոբյանի զննության արդյունքը, համաձայն որի երեխայի աչքի տեւողությունը իջել է մինչեւ տաս տոկոս, աչքը սնուցող թաղանթն էլ մահացել է, ինչը կարող է հարվածի հետեւանք լինել:
Համաձայն «Գրիգոր Լուսավորիչ» բուժկենտրոնի եզրակացության էլ, տեսողության կորուստը կարող է «վարակիչ հիվանդությունների, ալերգիաների, ինչպես նաեւ նյարդային այլ հիվանդությունների պատճառ լինել»:
Ուշադրության արժանի է այն, որ վկա՝ Սուսաննա Գալոյանի պաշտպան, ՀՀ փաստաբանների պալատի անդամ Լուսինե Օհանյանի, իրենք բժշկական եզրակացությունների մասին տեղեկացել են լրատվամիջոցների հաղորդումներից:
61-ամյա մաթեմատիկայի ուսուցչուհի Սուսաննա Գալոյանը Aravot.am-ի հետ զրույցի ժամանակ ասաց, որ իրեն ոչ մի լրատվամիջոց չի դիմել: Ինքը հնարավորություն չի ունեցել ասել նաեւ իր խոսքը:
Նա ասաց, որ ինքը չի հարվածել երեխային, երբեք նման բան չի եղել իր քառասնամյա գործունեության ժամանակ:
Ի պատասխան լրատվամիջոցների այն հայտարարությանը, թե նմանատիպ դեպք էլ տեղի է ունեցել Նորաբաց գյուղում, ուր աշխատել է, ուսուցչուհին ներկայացրեց Նորաբացի դպրոցի մանկավարժական խորհրդի անդամների ստորագրությամբ բնութագիրը: Համաձայն այդ բնութագրի. «Սուսաննա Գալոյանն աշխատել է 1975-1994թթ.ապրիլը: 1987-89թթ.աշխատել է որպես դպրոցի ուսումնական գծով տնօրենի տեղակալ: Նորաբացի դպրոցում աշխատելու տարիներին Ս.Գալոյանն աչքի է ընկել աշխատանքային կոլեկտիվի եւ աշակերտների շրջանում: Երբեւիցե աշակերտների կամ ծնողների հետ որեւէ կոնֆլիկտ չի ունեցել»:
Ի դեպ, այն տեղեկատվությանը, թե մանկավարժին հեռացրել են աշխատանքից, մեր տրամադրության տակ կա տեղեկանք, որը տրվել է ՀՀ Արարատի մարզի Նորաբաց գյուղի միջնակարգ դպրոց-ՊՈԱԿԻ տնօրենի ստորագրությամբ: Համաձայն դրա էլ, Ս.Գալոյանն 11.04.1997թ. ազատվել է աշխատանքից իր դիմումի համաձայն:
Ուսուցչուհին հայտնեց, որ երբ տեղեկացել է, թե աշակերտը բողոքել է իր մասին, մեկ այլ ուսուցչի հետ գնացել է նրանց տուն, քանի որ զարմացած էր, թե նման բան է եղել:
9 թոռ 3 երեխա ունեցող մանկավարժը, ասում է, երբ հարցրել է տուն մտած աշակերտին, թե ինքը հարվածե՞լ է նրան, երեխան նայել է ծնողին, ապա լաց եղել:
Ոստիկանությունը քննել է դպրոցի տնօրենին, դասղեկին, անգամ Գրիգորի համադասարանցիներին:
Ռուզան ՄԻՆԱՍՅԱՆ
