«Ամերիկայի Ձայն». Թուրքիայում դատարանը սկսել է դատավճիռներ ներկայացնել «Էրգենեկոն»ի գործով անցնողերին՝ որոշ ամբաստանյալներին դատապարտելով մինչև 20 տարվա ազատազրկման
Թուրքիայում դատարանը սկսել է դատավճիռներ ներկայացնել «Էրգենեկոն»ի գործով անցնողերին՝ որոշ ամբաստանյալներին դատապարտելով մինչև 20 տարվա ազատազրկման:
Մեղադրանքները մինչ այժմ հանվել են գործով անցնող 21 անձից, սակայն այս թիվը դեռևս վերջնական չէ:
Ստամբուլի մոտակայքում գտնվող Սիլիվրի քաղաքի դատարանը երկուշաբթի օրն անհատական վճիռներ է ներկայացնում գործով անցնող 275 ամբաստանյալի:
Կարդացեք նաև
Թուրքիայի անվտանգության ուժերն արգելափակել են մուտքը դեպի Սիլիվրիի դատարան: Դատարանի դահլիճ մուտքը թույլատրվում է միայն ամբաստանյալներին, փաստաբաններին և լրագրողներին:
«Էրգենեկոն»-ի գործով անցնում են Թուրքիայի բազմաթիվ գեներալներ, լրագրողներ, գիտնականներ և իրավաբաններ, որոնց մեղադրում են հեղաշրջում կազմակերպելուն ուղղված գործունեություն իրականացնելու մեջ: Թուրքիայի վարչապետ Ռեջեփ Թայիփ Էրդողանի գլխավորած «Արդարություն և զարգացում» կուսակցության համաձայն, «Էրգենեկոն»-ի գործը երկրի ժողովրդավարականացման գործընթացի մաս է կազմում, որտեղ զինված ուժերը 1960 թվականից պաշտոնանկ են արել ընտրությունների միջոցով ձևավորված չորս կառավարություն: Ընդդիմախոսները պնդում են սակայն, որ դատավարությունը ցույց է տալիս երկրի իսլամիստական արմատներ ունեցող վարչապետի անհանդուրժողականությունն այլախոհների նկատմամբ», – գործին նվիրված հոդվածում գրում է «Բլումբերգ» գործակալությունը:
Միջազգային հանրությունը բազմիցս իր մտահոգությունն է արտահայտել «Էրգենեկոն»-ի դատավարությամբ: ԱՄՆ-ի արտգործնախարարության այս տարի հրապարակված ամենամյա զեկույցում նշվել են գործով անցնող անձանցից շատերի նկատմամբ կիրառված նախաքննական երկարատև բանտարկության փաստը:
«Էրգենեկոն»-ի գործը քննադատության է ենթարկել նաև «Human Rights Watch» իրավապաշտպան կազմակերպությունը, որը լուրջ մտահոգություններ է արտահայտել դատավարության արդար լինելու հանգամանքով:
Արմեն Հովհաննիսյան
