Հուլիսի 26-ից Երևանի քաղաքապետարանի դիմաց քաղաքապետարանի տրանսպորտի վարչության պետի և «Երևան տրանս» ՓԲԸ տնօրենի պաշտոնանկության պահանջով անժամկետ նստացույց հայտարարած Գոռ Առաքելյանը, Սուրեն Սահակյանը և Վահագն Մինասյանն այսօր հրավիրված մամուլի ասուլիսում հայտարարեցին, որ դիմում են ՄԻՊ Կարեն Անդրեասյանին, որպեսզի կարգավորվի տարածքի արհեստական թրջման հարցը, ինչպես նաև թույլատրվի վրանի կամ հովանոցի տեղադրումը:
Հիշեցնենք, որ նստացույցի մասնակիցներին չեն թույլատրում քաղաքապետարանի առջև վրան տեղադրել:
Նստացույցի մասնակիցները, հղում կատարելով ՀՀ օրենսդրությանը, թվարկեցին, թե ինչ իրավախախտումների են դիմել տրանսպորտի վարչության պետ Հենրիկ Նավասարդյանը, ինչպես է նա վիրավորել լրագրողներին, ահաբեկել տրանսպորտի գնի թանկացման դեմ պայքարող ակտիվիստներին:
«Երևան տրանս» ՓԲԸ տնօրեն Միսակ Համբարձումյանի և Հենրիկ Նավասարդյանի հրաժարականը պահանջելու հիմնավոր պահանջ են համարում նաև օրենքով նախատեսված սահմանափակումների շրջանցումը:
Դառնալով այն պայմաններին, որոնցում նստացույցի մասնակիցները անցկացնում են ողջ օրը, նշեցին, որ անընդհատ Երևանի քաղաքապետարանի հարակից տարածքը ջրվում է՝ եզրաքարերն ու մայթը շարունակաբար պահելով խոնավ վիճակում, որի հետևանքով նույնիսկ խոտածածկի եզրաքարերին անհնար է նստել:
Նստացույցի մասնակիցներից Սուրեն Սահակյանը նշեց, որ Հ. Նավասարդյանի որդիներին է պատկանում թիվ 18 երթուղին:
Նստացույցի մասնակիցներից Վահագն Մինասյանն էլ նշեց, որ ուրբաթ նոր հայտարարությամբ են հանդես գալու:
Ակտիվիստները նաև պահանջում են պատասխանատվության ենթարկել այն անձանց, ովքեր գողացել են նստացույցի մասնակիցների պաստառները, որոնք ըստ մասնակիցների՝ ոստիկաններ են:
Նստացույցի մասնակիցները նշեցին, որ ՄԻՊ-ը իրենց չի այցելել, մի անգամ, երբ լույսերը լրիվ անջատել էին, ահազանգել էին ՄԻՊ-ին, սակայն արձագանքել են միայն երկու օր անց, երբ արդեն կարիքը չկար:
Տաթև ՀԱՐՈՒԹՅՈՒՆՅԱՆ
