ՀՀ Արդարադատության նախարարության Վանաձոր քրեակատարողական հիմնարկից հերքում են այն տեղեկատվությունը, թե այս օրերին ՔԿՀ-ում 10-ից ավելի կալանավոր է հացադուլի նստել:
Aravot.am –ի հետ զրույցում ՔԿՀ-ից հայտնեցին, որ այս պահին հացադուլի մեջ գտնվում են երկու հոգի` Արտակ Գինոսյանն ու Հովհաննես Հովհաննիսյանը:
«Այդ տեղեկատվությունը չի համապատասխանում իրականությանը: Այսօր առավոտյան ունեցել ենք երեք հացադուլավոր` Արտակ Գինոսյանը, Հովհաննես Հովհաննիսյանը եւ Տիգրան Նիկողոսյանը: Բարեբախտաբար, վերջինիս հետ տարվող բացատրական աշխատանքները արդյունք տվեցին, եւ նա դուրս եկավ հացադուլից, մյուսների հետ եւս բացատրական աշխատանքներ են տարվում»,-տեղեկացրին «Վանաձոր» ՔԿՀ-ից:
Քրեակատարողական հիմնարկից հավելում են, որ Տիգրան Նիկողոսյանի` հացադուլ սկսելու պատճառը այլ ՔԿՀ տեղափոխվելու պահանջն էր: Այժմ, սակայն, երբ նրան բացատրվել է, որ կարող է գրավոր դիմում ներկայացնել հարցի կապակցությամբ, նա դուրս է եկել հացադուլից:
Կարդացեք նաև
«Մյուս երկուսի պատճառները ՔԿՀ-ի ադմինիստրացիայի հետ կապված չեն, այդկերպ նրանք իրենց բողոքն են արտահայտում քրեական գործերի դեմ»,-տեղեկացրին մեզ:
Ըստ ՔԿՀ-ի տեղեկատվության` Արտակ Գինոսյանը հացադուլի մեջ է հուլիսի 29-ից, Հովհաննես Հովհաննիսյանը` շուրջ 10 օր, Տիգրան Նիկողոսյանն էլ մեկ օր հաց չէր կերել:
Անուշ ԲՈՒԼՂԱԴԱՐՅԱՆ
