Հարուցվել է քրեական գործ
Զինվորական գործերը, որպես կանոն, դատարանում ընթանում են արագացված ընթացակարգով: Մեղադրյալներն ընդունում են իրենց մեղքը, սակայն պատժաչափը հետագայում բողոքարկում բարձրագույն դատական ատյաններում:
Այդպիսի արագացված քննության եւ դատական ակտի դեմ բողոք կա ՀՀ վերաքննիչ քրեական եւ զինվորական դատարանում:
Արմավիրի մարզի ընդհանուր իրավասության դատարանի դատավոր Արթուր Ադամյանի նախագահությամբ քննվել էր ՀՀ ՊՆ զորամասերից մեկի հրամանատար, կոչումով կապիտան Արգամ Հարությունյանի եւ կուրսանտ, շարքային Մեսրոպ Հակոբյանի դեմ հարուցված քրեական գործը:
Կարդացեք նաև
Երեւանի կայազորի զինվորական դատախազության դատախազ Վազգեն Հարությունյանը պաշտպանել էր սույն մեղադրանքը:
Փետրվարի 7-ի որոշմամբ դասակի հրամանատար, կապիտան Արգամ Հարությունյանի եւ նույն վաշտի ջոկի ժամկետային զինծառայող, շարքային Մեսրոպ Հակոբյանի վերաբերյալ նախապատրաստված նյութերով հարուցվել է քրեական գործ` ՀՀ քրեական օրենսգրքի 358 հոդվածի 1-ին մասի եւ 375 հոդվածի 1-ին մասի հատկանիշներով, եւ քրեական գործն ուղարկվել է ՀՀ ՊՆ ՔԾ 4-րդ կայազորային քննչական բաժին:
Արգամ Հարությունյանի նկատմամբ որպես խափանման միջոց էր ընտրվել չհեռանալու մասին ստորագրությունը, իսկ շարքայինին կալանավորել են:
Ըստ գործի նյութերի, կապիտան Արգամ Հարությունյանը գնացել էր զորամասի բաղնիք՝ լոգանք ընդունելու նպատակով:
Բաղնիքի դիմաց գտնվելու ընթացքում՝, այն բանից հետո, երբ վաշտի կուրսանտները շարքից դուրս գալով այս ու այն կողմ են քայլել, կուրսանտ Մեսրոպ Հակոբյանը, դիմելով վաշտի կուրսանտներին, կատակով նրանց «բրիգադա զգաստ» հրամանն է տվել: Այդ լսելով՝ կապիտանը պահանջել է, որ կուրսանտները շարքում լռություն պահպանեն: Կուրսանտ Մեսրոպ Հակոբյանը, շարքին դիմելով, կատակով ասել է. «Այդ ովքեր են շարքում խոսում»: Կապիտանը, լսելով այդ, իր մոտ է կանչել Մեսրոպ Հակոբյանին, հարցրել է նրան, թե ինչո՞ւ է նա իրեն նմանակում, ապա՝ ապտակել:
Կուրսանտը, դիմելով կապիտանին, հարցրել է, թե ինչու է նա իրեն ապտակում: Հրամանատարը կրկին ապտակում է զինվորին: Զինվորը բռնում է կապիտան Ա. Հարությունյանի ձեռքերը, որպեսզի նա իրեն չհարվածի, իսկ կապիտանը, կուրսանտի հասցեին սեռական բնույթի հայհոյանքներ տալով, գլխով հարվածել էր նրա դեմքին:
Ականատես կուրսանտները մոտեցել, նրանց իրարից հեռացրել են, ինչից հետո կապիտան Հարությունյանը կուրսանտ Հակոբյանին տարել է գումարտակի կողմ: Ըստ գործի նյութերի, ծնողների հասցեին հայհոյանքի համար, կուրսանտը բռունցքով հարվածել է նրա դեմքին, ինչի հետեւանքով հարմանատարը ընկել է: Գետնին ընկած վիճակում կուրսանտը ոտքով հարվածել է կապիտանի դեմքին:
Արագացված դատաքննության ժամանակ առաջադրված մեղադրանքների հետ ամբաստանյալները համաձայն են եղել:
Դատավճռով Արգամ Հարությունյանը դատապարտվել է զինվորական ծառայության մեջ սահմանափակմամբ երկու տարի ժամկետով՝ աշխատավարձի 10%-ի պահումով,
Մեսրոպ Հակոբյանը՝ ազատազրկման 3 տարի ժամկետով: ՀՀ քրեական օրենսգրքի 70 հոդվածի կիրառմամբ ազատազրկման ձեւով նշանակված պատիժը պայմանականորեն չի կիրառվել եւ սահմանվել է փորձաշրջան 2 տարի ժամկետով:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
