Այս միջազգայնորեն ընդունված նորմը մեր իշխանությունները հարմարեցնում են իրենց քիմքին՝ «թույլատրված չէ, ուրեմն արգելված է» ձեւով:
Երեկ, ժամը 12-ի սահմաններում, քաղաքապետարանի մոտ բախումներ են տեղի ունեցել: «Վճարում ենք 100 դրամ» նախաձեռնության անդամները փորձել են արդեն 6-րդ օրը նստացույց անող 3 ակտիվիստների համար տարածքում վրան տեղադրել, ինչին խոչընդոտել են ոստիկանները: Ակտիվիստներից մեկին՝ Արգիշտի Կիվիրյանին, բռնի ուժով եւ նրան մարմնական վնասվածքներ հասցնելով տեղափոխել են ոստիկանական բաժին, վրանն էլ խլել ակտիվիստների ձեռքից:
Փոխոստիկանապետ Վալերի Օսիպյանը վստահեցրել է, որ չի պատրաստվում առայժմ վրանը վերադարձնել, այն շատ լավ տեղում՝ ոստիկանությունում կպահվի այնքան ժամանակ, որքան նպատակահարմար է: Նա սպառնացել է նաեւ բերման ենթարկել եւ վարչական պատասխանատվություն կիրառել բոլոր այն ակտիվիստների նկատմամբ, ովքեր եւս մեկ անգամ փորձ կանեն այդ տարածքում վրան տեղադրել:
Այս առնչությամբ «Առավոտը» իրավապաշտպան, Հելսինկյան կոմիտեի նախագահ Ավետիք Իշխանյանից հետաքրքրվեց, թե որքանո՞վ են իրավաչափ ոստիկանների գործողությունները, եւ մեր օրենսդրությամբ իսկապե՞ս նստացույց անողներն իրավունք չունեն առանց հատուկ թույլտվության վրան տեղադրել: Պարոն Իշխանյանը պատասխանեց. «Մեր օրենքով այդ հարցը կարգավորված չի: Միանգամից կարելի է ենթադրել, որ եթե օրենքով այն արգելված չի, ուրեմն ակտիվիստները կարող էին տեղադրել վրանը: Ես այդպես եմ ենթադրում եւ այդպես եմ կարծում: Բայց այդ հարցի շուրջ Մաշտոցի պուրակի դեպքերի ժամանակ բավականին մեծ քննարկում եղավ: Ընդդիմախոսներն ասում էին, որ հանրային օգտագործման վայրերում միայն պիտի թույլտվություն լինի վրան տեղադրելու: Բավականին մեծ բանավեճ եղավ: Կային նաեւ միջազգային փորձագետներ, որոնք նույնպես կարծում էին, որ հանրային օգտագործման վայրերում պետք է հատուկ թույլտվություն լինի: Ես բազմաթիվ օրինակներ բերեցի միջազգային օրինակներից, որ նման բան չկա: Ամեն դեպքում քննարկման արդյունքում մենք այդպես էլ ընդհանուր համաձայնության չեկանք: Բայց ես նորից կրկնեմ իմ կարծիքը՝ մեր օրենքը դա չի արգելում, բայց իշխանություններն են պնդում, որ դրա համար թույլտվություն է պետք: Իմ կարծիքով՝ եթե արգելված չի, ուրեմն կարելի է, ու եթե արգելված չի, ոստիկանները չեն կարող վարչական պատասխանատվության ենթարկել»:
Կարդացեք նաև
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
