Վազաշենում սատկել է 156 խոզ
Հուլիսի 14-ից մինչ այժմ Տավուշի մարզի Իջեւանի տարածաշրջանի սահմանամերձ Վազաշեն գյուղում սատկել է թվով 156 տարբեր քաշի, տարիքի եւ սեռի խոզ: Վազաշենի գյուղապետ Լորիկ Բադիրյանից տեղեկացանք, որ գյուղում խոզերի անկումը շարունակվում է: Գյուղապետն ասաց. «Հուլիսի 19-ին ինձ պաշտոնապես հայտնել են, որ խոզերի անկման պատճառը աֆրիկյան ժանտախտ հիվանդությունն է: Եթե մինչ այդ անկված խոզերը թաղում էին տարբեր տեղերում՝ սեփական հողամասում կամ այլ տեղ, դրանից հետո խոզերի թաղումը այդ նպատակով հատուկ վայրում է կատարվում, իրականացվել են ախտահանման աշխատանքներ»:
Մեր տեղեկություններով աֆրիկյան ժանտախտից խոզեր են սատկել նաեւ Դիտավան համայնքում, սակայն Դիտավանի գյուղապետ Հակոբ Սարիբեկյանը դա ժխտեց: Գյուղնախարարության սննդամթերքի անվտանգության պետական ծառայության Տավուշի մարզային բաժնի ղեկավար Վասիլ Գալստյանը աֆրիկյան ժանտախտի հետ կապված տեղեկություններ չտրամադրեց, ասելով, որ ինքն արձակուրդում է:
Գյուղացիները դժգոհում են, որ 4500 դրամով գնում են անասնակեր թեփի 28-30 կգ պարկը, կերակրում-պահում խոզերը, սակայն արդյունքում կենդանիները սատկում են: Հավելենք, որ խոզերի այս հիվանդությունը բուժում չունի: 2007 թվականին աֆրիկյան ժանտախտը տարածվեց Հայաստանում: Մասնագետների վկայությամբ՝ այդ հիվանդության վարակը 7 տարի պահպանվում է շրջակա միջավայրում: 2007 թվականին սույն հիվանդության համաճարակի հետեւանքով Տավուշի մարզում հարյուրավոր խոզեր սատկելով՝ չթաղվեցին, նեխեցին անտառներում եւ ձորերում, վարակը տարածվեց բնության մեջ:
Ոսկան ՍԱՐԳՍՅԱՆ
