Այսօր Արագածոտնի մարզպետ Սարգիս Սահակյանի առաջարկով եւ ՀՀԿ-ի Արագածոտնի կանանց հանձնախմբի համատեղ աջակցությամբ՝ փոխմարզպետ Նունե Մովսիսյանը, մարզպետարանի աշխատակազմի առողջապահության բաժնի պետ Սիլվա Թադեւոսյանը եւ ՀՀԿ Արագածոտնի մարզային գրասենյակի կոորդինատոր Շուշանիկ Շուխյանը շրջայց կատարելով Արագածոտն մարզի Աշտարակ, Ապարան, Ծաղկահովիտ բժշկական կենտրոններում, ծաղիկներ, հուշանվերներ, շնորհավորական բացիկներ նվիրեցին տարածաշրջանի հիվանդանոցներում այսօր ծննդաբերած մայրերին:
Շրջայց կատարելուց եւ նվերներ փոխանցելուց բացի, մի փոքր ուսումնասիրեցինք շենքային պայմանները, որտեղ Ապարանի բժշկական կենտրոնի տնօրեն Հայկ Շմավոնյանի խոսքով` հիվանդանոցը վերանորոգվել է, հագեցվել գույքով եւ սարքավորումներով 2010 թվականին, ունենալով` հրաշալի մասնագետներ. «Ես ինքս էլ լինելով վիրաբույժ պատրաստում եմ կադրեր: Այսօր իմ աշակերտները հրաշալի, առանց վախենալու կեսարյան հատում են անում, իհարկե, իմ վերահսկողության եւ անմիջական ներկայությամբ»,-ասաց Շմավոնյանը:
Կարդացեք նաև
Ըստ նրա` Ապարանի հիվանդանոցի թե շենքային, թե տեխնիկական եւ թե մասնագետների առումով լիովին համապատասխանում է որակյալ բուժում ստանալու եւ շատ կյանքեր փրկելու համար: Շմավոնյանն ամեն բան անելու է, որպեսզի իր բուժհաստատությունը վստահություն ունենա տարածաշրջանում. «Եթե մարզպետը, գյուղապետը, իրենց ընտանիքները օգտվեն քո հիվանդանոցից, ապա ինքնաբերաբար մյուսների մոտ վստահություն է ձեւավորվում»,-ասաց տնօրենը, հավելելով, որ գլխավորը հիվանդի նկատմամբ վերաբերմունքն է. «Չունես վերաբերմունք, հիվանդ չես ունենա.սա էլ է բիզնես: Եվ ամենակարեւորը, որ մեր հիվանդանոցում իմ ու քո հիվանդ չկա : Հավասար նայում ենք բոլոր հիվանդներին: Նրանք բոլորը բոլորիս հիվանդներն են, տարբերություն չկա: Հիվանդանոցը սրբավայրի նման մի վայր է»,-վստահեցրեց վիրաբույժը:
Այլ էր պատկերը Ծաղկահովիտ բժշկական կենտրոնում: Այստեղ առաջնային կարեւորագույն խնդիրներից մեկը շենքի վերանորոգման հարցն է: Ազատ Ղուկասյանն ընդամենը յոթ ամիս է, ինչ նշանակվել է տնօրեն: Այս ընթացքում վերանորոգել է չորս հիվանդասենյակ եւ դիահերձարանը.«Իմ հնարավորությունների չափով արել եմ, որքան կարողացել եմ, անգամ ներդնելով սեփական միջոցներից, քանի որ խայտառակ պատկեր էր: Մասնագետների խնդիր չունենք, մեր միակ առաջնային խնդիրը շենքի վերանորոգումն ու պայմանների բարելավումն է»,-ասաց նա:
Նույն խնդրի առաջ էր կանգնած նաեւ Աշտարակի բժշկական կենտրոնը, սակայն ի տարբերություն Ծաղկահովիտ բժշկական կենտրոնի, այս բուժհաստատության համար նախագահն ինքն է խոստացել աջակցել, որի մասին ասաց կենտրոնի տնօրեն Արթուր Հովհաննիսյանը:
Քրիստինա ՄԻՐԶՈՅԱՆ
