Azatutyun.am․ Ստամբուլի քրեական դատարանը չորեքշաբթի օրը որոշել է վերաբացել Գերմանիայում բնակվող թուրք գրող Դողան Աքհանլիի նկատմամբ քրեական գործը, ում դեմ մեղադրական դատավճիռն ավելի վաղ վերանայվել էր Թուրքիայի գերագույն Վերաքննիչ դատարանի կողմից: Գերմանական DPA գործակալությունը հաղորդում է, որ ըստ գրողի` Թուրքիայի իշխանություններն արդեն իրեն ձերբակալելու միջազգային օրդեր են տվել:
«Տպավորություն է, կարծես այս գործը ֆուտբոլի գնդակ է դարձել Թուրքիայում իշխող տարբեր խմբավորումերի ձեռքում», – ասել է տարիներ շարունակ գերմանական Քյոլնում բնակվող թուրք գրողը՝ առանց մանրամասնելու, թե որ ուժերն են հատկապես իրեն հետապնդում:
Պաշտոնապես Աքհանլին մեղադրվում է 1989 թվականին տարադրամի փոխանակման կետի վրա ավազակային հարձակման և մարդասպանության համար, մեղադրանքն առաջադրվել էր ընդամենը երկու մարդու ցուցմունքի հիման վրա, ովքեր, սակայն, հետագայում հրաժարվել էին իրենց վկայություններից:
Գրողի համոզմամբ, մինչդեռ, իրականում Թուրքիայի իշխանությունները իրեն հետապնդում են ձախակողմյան հայացքների և Հայոց ցեղասպանության մասին արած հրապարակային հայտարարությունների համար:
Կարդացեք նաև
«Հույս ունեի, որ այս ողջ տխմարությունն արդեն ավարտվել է», – գերմանական լրատվամիջոցներին երեկ ասել է թուրք գրողը, ում օգտին ավելի վաղ պաշտպանական հայտարարություններ էին տարածել գրականության ոլորտում Նոբելյան մրցանակակիրներ Գյունթեր Գրասն ու Օրհան Փամուկը:
Երեկ Ստամբուլում տեղի ունեցած աղմկահարույց դատավարությանը ևս հետևել են մի շարք արևմտյան մտավորականներ ու իրավապաշտպաններ:
«Ես պայքարում եմ Թուրքիայի վարած մերժողական քաղաքականության դեմ և հայերի նկատմամբ իրագործած ցեղասպանության ճանաչման համար», – հարցազրույցներից մեկում ասել էր Աքհանլին ու ընդգծել․ – «Ես ցանկանում եմ կրկին զգալ, որ այն երկիրը, որտեղ ծնվել եմ, իմ երկիրն է: Այդ իրավունքը վերապահված է նաև այն հայերին, ովքեր ժամանակին ապրել են Թուրքիայում և կորցրել են իրենց հայրենիքը»:
Մանրամասները՝ «Ազատություն» ռ/կ-ի կայքում։
