Այսօր առաջին անգամ ճանաչողական այցով Գյումրիում էր ՀՀ-ում Գերմանիայի դաշնության արտակարգ եւ լիազոր դեսպան Ռայներ Մորելը: Դեսպանը նախ եղավ Գյումրու քաղաքապետ Սամվել Բալասանյանի մոտ, որտեղ խոսեցին Գյումրու խնդիրներից` գործազրկության, անօթևանության թեմաներից: Լսելով բնակարանային խնդիրների մասին` դեսպանը ցավակցական տոնով ասաց. «Իհարկե, բավական տխուր է, որ երկրաշարժից 25 տարի հետո ոչ քիչ քանակությամբ, այլ մեծաթիվ մարդիկ բնակվում են ժամանակավոր կացարաններում»: Այնուհետ պարոն Մորելը քաղաքապետից հետաքրքրվեց, թե ի՞նչ է պլանավորում քաղաքապետարանը 4000 անօթևանի խնդիրների լուծման համար: Սամվել Բալասանյանը դեսպանի այս հարցի վրա մի լավ գովերգեց երկրի նախագահ Սերժ Սարգսյանին` թվարկելով, թե նրա նախաձեռնությամբ քանի բնակարան է կառուցվել Գյումրիում և քանիսն է նախատեսվում կառուցել:
Այնուհետ քաղաքապետը պատճառաբանեց, որ բնակարանների թիվը չի բավարարում այն պատճառով, որ աճող ընտանիքներ կան, նաև մարդիկ, ովքեր գյուղերից եկել, Գյումրիում տնակներ են դրել և ապրում են: Դիվանագետը նաև հետաքրքրվեց, թե ինչո՞վ է ապրում քաղաքը: Գյումրու քաղաքապետն ասաց, որ նախկինում թեթև արդյունաբերության կենտրոն համարվող քաղաքն այսօր երկամուտներ է ստանում միայն ծառայություններից, նա տեղեկացրեց, որ քաղաքի 60 տոկոսից ավելին գործազուրկներ են: Քաղաքապետը ինչ-որ տեղ ակնարկելով դեսպանին` նշեց, որ Գյումրիում արդեն իսկ ներդրողներ են գալիս, հետաքրքրվում, սակայն առայժմ միայն մեր հայրենակիցներն են: Սամվել Բալասանյանը դեսպանին ավանդույթի համաձայն նվիրեց Գյումրվա մուշուրբան` կլկան բաժակը, Գյումրու մասին գրված գիրքը:Դեսպանը քաղաքապետի մոտից շտապեց մարզպետ Ֆելիքս Ցոլակյանի մոտ:
Նունե ԱՐԵՎՇԱՏՅԱՆ
Նեմեցի աչքին թոզ են փչում, որ հետո էլ վիզը ծռած փող խնդրեն, հետագայում իրենց ջեբը դնելու համար: