Այսօր Շիրակի մարզի ընդհանուր իրավասության դատարանում 27-ամյա Կարեն Եսայանի սպանության գործով դատավարությունը սկսվելուն պես հետաձգվեց` վկաների դատարան չներկայանալու պատճառով:
Նշենք, որ նիստը սկսվեց մոտ 1 ու կես ժամ ուշացումով, քանի որ Կարեն Եսայանի իրավահաջորդի շահերը ներկայացնող փաստաբանն ու դատախազը Երևանից ճիշտ ժամանակին տեղ չէին հասել: Ինչևէ, նիստը սկսվելուն պես դատավոր Մարտին Սարոյանը տեղեկացրեց, որ երկու վկաների են ծանուցագիր ուղարկել դատարան ներկայանալու, նրանցից մեկը` Հովհաննես Եգանյանն է, որի դուռը փակ է եղել, մյուսը` Վարդան Ղուկասյանը, որին թեև պատշաճ ծանուցել են, բայց հետադարձ ծանուցում չեն ստացել:
Ամբաստանյալ Հարություն Սարգսյանի փաստաբան Լուսինե Սահակյանը հետաքրքրվեց, թե ինչո՞ւ դատարանը հետևողական չէ, ինչո՞ւ փոստային առաքումները չեն վերադարձվում դատարան: Փաստաբանը նաև հետաքրքրվեց, թե ինչո՞ւ դատարան չի գալիս Վարդան Ղուկասյանի դուստրը` Մանյան, քանի որ , ըստ փաստաբանի, դատարանը խոսում է միայն հորը չներկայանալուց: «Հարգելի դատարան, ես խնդրում եմ շարունակել դատական նիստը, չպիտի մոռանանք, որ ողջամիտ ժամկետում պիտի քննվի, մինչդեռ ամիսներ շարունակ սպասում ենք, թե երբ Ղուկասյանները պիտի բարեհաճեն գալ դատարան», -ասաց Լուսինե Սահակյանը: Սակայն դատավորը որոշեց դատը հետաձգել` նշանակելով օգոստոսի 6-ին, ժամը 14.00-ին: Ի դեպ, դատախազը ևս միջնորդեց նորից ծանուցագիր ուղարկել այս վկաներին:
Կարդացեք նաև
Նունե ԱՐԵՎՇԱՏՅԱՆ
