«Մեծ Մահակ» ՍՊԸ-ին կտրվի նոր տարածք` Եղվարդի խճուղում
«Ես, օգտվելով ինձ վերապահված լիազորություններից, հրաժարվում եմ դատարան ներկայացրած հայցից»,-այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում քաղաքապետարանի որոշման կասեցման արդյունքում Սուրենյան փողոցի բնակիչների ներկայացուցիչ՝ հայցվոր Մնացական Ղազարյանը չեղյալ համարեց հայցադիմումը:
Դա տեղի ունեցավ այն բանից հետո, երբ Երեւանի քաղաքապետարանը որոշել էր չեղյալ հայտարարել «Մեծ Մահակ» ՍՊԸ-ին Պարոնյան պուրակում հատկացրած տարածքի որոշումը, ինչի առնչությամբ, այգու հարակից տարածքների բնակիչները արդեն քանի տարի բողոքում էին եւ դատարաններով փորձում վերականգնել հանրային շահը:
Նշենք, որ Պարոնյան պուրակում շինարարությունը սկսվել էր 2009 թվականին` քաղաքապետարանի թույլատվությամբ: Չհամակերպվելով այգին բռնագրավելու որոշմանը` տարածքի բնակիչները դիմել էին դատարան, որպեսզի քաղաքապետի որոշումը բեկանեն: Այսօրվա դատին ներկա բնակիչներին աջակցող ակտիվիստներից մեկն ասաց. «Կառուցապատող «Մեծ Մահակ» ՍՊԸ-ն սկզբում տարել է կառուցապատման աշխատանքներ՝ ցանկապատել է տարածքը: Այդ էլ հիմք հանդիսացավ, որ բնակիչները մինչ կառուցապատման աշխատանքները հայց ներկայացնեն դատարան: Քաղաքապետարանը չեղյալ համարեց իր հին որոշումը, ընդունեց նոր որոշում՝ ըստ որի «Մեծ մահակ» ՍՊԸ-ին, որպես փոխհատուցում, տրվեց այլ տարածք՝ Եղվարդի ճանապարհին՝ Դավթաշենի ծայրում: Ըստ էության, քանի որ մեր խնդրո առարկան վերացել է, քաղաքացիների ներկայացուցիչը որոշեց չեղյալ հայտարարել հայցադիմումը»:
Անի ՔԵՇԻՇՅԱՆ
