Այսօր լրագրողների հետ հանդիպման ժամանակ Հանրային խորհրդի երիտասարդական թեւի նախագահ Հռիփսիմե Մարգարյանը նշեց, որ դիմելու է բոլոր բուհերի ուսխորհուրդների նախագահներին՝ իրենց միանալու եւ առաջարկությունների փաթեթ ստեղծելու համար, որից հետո իրենք կդիմեն ՀՀ կրթության եւ գիտության նախարարությանը:
Ինչպես հայտնեց, իրենց խորհուրդը զբաղվում է բուհերում թանկացումների հարցերով եւ ուսումնասիրության արդյունքում բավականին մեծ փոփոխություններ են նկատել:
Նախաձեռնության հեղինակներն արդեն ունեն Հայաստանի պետական ճարտարագիտական համալսարանի ուսխորհրդի նախագահի համաձայնությունը, կհանդիպեն նաեւ մյուսների:
Մինչ թանկացումները կրթության եւ գիտության նախարարը հայտնել էր, որ ուսման վարձը կբարձրանա քսան տոկոսով, սակայն. «Արդեն հինգ բուհում բարձրացրել են 100-200 հազարով»: Ավելին` քան նախարարի նշած 20 տոկոսը:
Կարդացեք նաև
Քննարկմանը մասնակցում էին նաեւ տրանսպորտի թանկացման դեմ ուղղված բողոքի ակցիայի ակտիվիստ Ռուբեն Ալանակյանը եւ Երիտասարդ համալսարանականների միավորում հասարակական կազմակերպության փոխնախագահ Զոհրաբ Հովհաննիսյանը: Վերջինս հաստատեց, որ ԵՊՀ-ում մինիմալ շեմը սահմանվել է չորս հարյուր հազարը:
Նախաձեռնության հեղինակները պայքարը համարում են ուշացած, սակայն այն կարծիքի են, որ կհասնեն արդյունքի: Ռուբեն Ալանակյանը համոզված է, որ բոլոր թանկացումներն էլ փոխկապակցված են. «Պետք չէ տարանջատել որեւէ թանկացում, պետք է պայքարել բոլորի դեմ: Մենք այսօր չունենք բարելավված կրթական ոլորտ, այդ միֆերը չեն համապատասխանում իրականությանը, թե բարեփոխումներ են արվում: Այն գումարները, որոնք վճարում են ուսանողները երբեւէ չեն նպաստել գիտության զարգացմանը, դրանք գնում են կոնկրետ մարդկանց գրպանները: Այսօր բոլոր բուհերը ծայրից ծայր կուսակցականացված են եւ ուսանողների կողքին չեն կանգնում»,-ասաց ակտիվիստը:
Ռուբինա ՍԱՖԱՐՅԱՆ
