Հասմիկ Պապյանը Վագների եւ Վերդիի «ներկապնակով»
«Առավոտը» քանիցս անդրադարձել է օպերային պրիմադոննա, աշխարհի լավագույն օպերային թատրոններում հանդես եկող սոպրանո Հասմիկ Պապյանին: Նա միշտ եղել է հայաստանյան եւ արտերկրյա մամուլի ուշադրության կենտրոնում, Հասմիկ Պապյանը դասվում է մեր ժամանակների լավագույն սոպրանոների շարքը: Երգչուհու երկացանկում կենտրոնական դեր են զբաղեցնում Վերդիի օպերաները (13 դերերգ), իսկ վագներյան օպերաներից արտերկրյա մամուլը իրավամբ նշում է հայ երգչուհու մեկնաբանմամբ Սենտայի («Թռչող հոլանդացին») եւ Իզոլդայի («Տրիստան եւ Իզոլդա») դերակատարումները՝ համարելով դրանք Պապյանի դերասանական կարիերայի բանալին: Ինչ վերաբերում է Բելինիի «Նորմային», համանուն աղմկահարույց դերերգը նա ավելի քան 150 անգամ է կատարել, թողարկվել է Նիդերլանդների օպերային թատրոնի «Նորմայի» DVD-ն:
Հուլիսի 25-ին Վագների եւ Վերդիի ծննդյան 200-ամյակի առիթով «Արամ Խաչատրյան» համերգասրահում կայացավ Հասմիկ Պապյանի մենահամերգը՝ Հայաստանի պետական ֆիլհարմոնիկ նվագախմբի ընկերակցությամբ, որը ղեկավարում էր գեղարվեստական ղեկավար եւ գլխավոր դիրիժոր Էդուարդ Թոփչյանը: Համերգից հետո «Առավոտը» զրույցի հրավիրեց արվեստագիտության դոկտոր, Երեւանի Կոմիտասի անվան պետական կոնսերվատորիայի պրոֆեսոր Սվետլանա Սարգսյանին:
Մեր զրուցակիցը խոսեց համերգի եւ «բացերից», եւ «պլյուսներից»: Նա փաստեց, որ 25 տարի շարունակ Հասմիկ Պապյանը գործունեություն է ծավալել ինչպես համաշխարհային օպերային, համերգային, այնպես էլ հայաստանյան բեմերում: Կայացած համերգի առիթով էլ նշեց. «Թոփչյանի ղեկավարած նվագախումբը ավելի պատրաստ էր Վերդի, քան Վագներ ներկայացնել, ինչը հասկանալի է. Վերդիի էմոցիոնալ խառնվածքը ավելի մոտ է հայերիս: Ի դեպ, ունկնդիրը ցուցաբերեց մեծ հետաքրքրություն ե՛ւ Վերդիի, ե՛ւ Վագների հանդեպ: Ցավոք, Հասմիկ Պապյանի հերոսուհիներից շատերին Հայաստանում այդքան էլ լավ չենք «ճանաչում», քանի որ մեր երկրում մասնավորապես քիչ է կատարվում Վագներ: Հասմիկի հերոսուհիները տարբեր հոգեվիճակներում էին, եւ բնականաբար շատ բարդ էր մեկ երեկոյի ընթացքում ստանալ վագներյան եւ վերդիական իրական հերոսներին: Չնայած դա համերգային կատարում էր, սակայն դահլիճում տիրում էր օպերային մթնոլորտ: Հասմիկ Պապյանի պրոֆեսիոնալիզմի շնորհիվ ընդամենը արիաների միջոցով տպավորություն էր ստեղծվում, թե մի ամբողջ օպերա է կատարվում»:
Կարդացեք նաև
Սվետլանա Սարգսյանն ասաց, որ անչափ գնահատում է Հասմիկ Պապյանին, քանի որ երգչուհին կարողացավ ամեն անգամ հետաքրքիր ներկայացնել յուրաքանչյուր հերոսուհուն՝ հոգեվիճակով ու հույզերով հանդերձ: Մասնագետի ձեւակերպմամբ, երգչուհուն օգնում էր ոչ միայն բեմական հարուստ փորձը, արիտիստիզմը, երաժշտական գրականության խոր իմացությունը, այլեւ լեզվական խոչընդոտները «փշրելը»:
Անդրադառնալով նվագախմբին՝ պրոֆեսորը փաստեց, որ օրինակ Իզոլդայի մահվան տեսարանը նվագախումբը մեկնաբանում էր արագ տեմպով, մինչդեռ այդ ստեղծագործության յուրաքանչյուր հնչյունի պետք էր ողբերգական իմաստ հաղորդել: Մեր զրուցակիցը նաեւ հավելեց, որ նվագախումբը համոզիչ ու որակով հնչեցրեց հատկապես Վերդիի «Ճակատագրի ուժը» օպերայի նախերգանքը:
Սեփ.լր.
«Առավոտ» օրաթերթ
