Վերջին շրջանում Սուրբ Սարգիս եկեղեցուն կից գործող «Արարատ» հոգեւոր միության եւ նրա հոգեւոր հովիվ Տեր Հակոբ քահանայի մասին բուռն քննարկումներ են տեղի ունենում: Հոգեւոր հովվի հետ կապված փոփոխություններն առիթ հանդիսացան այլ հոգեւորականների` մասնավորապես` Տեր Շահե քահանայի կողմից, անպարկեշտ արտահայտությունների ու չհիմնավորված մեղադրանքների:
Նա «Արարատ» միությունն անվանեց մեկ անձի շուրջ հավաքված մի խումբ մարդկանց կառույց, իսկ Տեր Հակոբին որակեց որպես միայն պաշտոնյաների հետ շփվող, մեծահարուստ հոգեւորական։ Եղան նաեւ հոգեւորականներ, ովքեր հանդես եկան ի պաշտպանություն Տեր Հակոբ քահանա Խաչատրյանի:
Մայր Աթոռի տեղեկատվական համակարգի տնօրեն Տեր Վահրամ քահանա Մելիքյանն էլ մեզ հետ զրույցում հայտնեց, որ ինքն իրավասու չէ խոսել Նավասարդ արքեպիսկոպոս Կճոյանի քայլերից: «Ինչ վերաբերվում է Տեր Հակոբի տեղափոխությանը` դա առաջնորդի իրավասությունն է: Իսկ այն, ինչ տեղի է ունեցել քահանաների միջեւ, ցավալի է, անձամբ ինձ համար ընկալելի չէ։ Կարծում եմ, որ անգամ, եթե նրանց միջեւ հակասություններ էլ կան, ապա Տեր Շահեն խնդիրները լուծելու այս տարբերակը չպետք է ընտրեր»,- ասաց տեր Վահրամ քահանա Մելիքյանը:
Այն հարցին, թե ըստ իրեն որո՞նք են այդ կերպ վարվելու դրդապատճառները, Տեր Վահրամը հայտնեց, որ ինքը, որպես այդպիսին որեւէ դրդապատճառ չի տեսնում. «Նավասարդ սրբազանը գործել է իր իրավասությունների շրջանակներում»:
Կարդացեք նաև
Ռուբինա ՍԱՖԱՐՅԱՆ
