ՀՀ ոստիկանության համաձայն՝ հուլիսի 25-ին, ժամը 01.50-ին, հիվանդանոցից ոստիկանության Կենտրոնականի բաժնում հաղորդում է ստացվել, որ «կոմա անհայտ Էթիոլոգիա» ախտորոշմամբ շտապօգնության խումբը Մաշտոցի պողոտայի և Թումանյան փողոցի խաչմերուկից բուժօգնության է տեղափոխել 1980 թ. ծնված Վահան Հովհաննիսյանին:
Նույն օրը, ժամը 02.45-ի սահմաններում, Վ. Հովհաննիսյանը, գիտակցության չգալով, հիվանդանոցում մահացել է:
Նշանակվել է դատաբժշկական փորձաքննություն: Փաստի առթիվ ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ:
Նշենք, որ ավելի վաղ NEWS.am-ը հաղորդել էր, որ հեծանվով երթեւեկող անհայտ անձը գնդակահարել է տաքսու վարորդ, 33-ամյա Վահան Հովհաննիսյանին:
Կարդացեք նաև
Վահան Հովհաննիսյանի հարազատների փոխանցմամբ, նա մեքենայով հասել է Մաշտոցի պողոտա-Թումանյան փողոց խաչմերուկի հատված, որտեղ վեճ է ծագել մի հեծանվորդի հետ: Վերջինս նստել է տաքսին, ապա քիչ անց դուրս եկել եւ փախուստի դիմել: Վահան Հովհաննիսյանը եւս դուրս է եկել մեքենայից եւ ընկել:
Ժամանած շտապօգնությունը վարորդին տեղափոխել է 2իվ 1 համալսարանական կլինիկա, որտեղ ժամը 3-ի սահմաններում Հովհաննիսյանը մահացել է: Նրա մարմնից դուրս են բերել «ՏՕԶ» տեսակի հրազենի գնդակ: Չարագործը կրակել էր վարորդի որովայնին:
Ոչ հրազենն է հայտնաբերվել, ոչ էլ հեծանվորդը: Սպանվածի մահվան վկայականում դատաբժշկի տված եզրակացության համաձայն, Վահան Հովհաննիսյանը ստացել է որովայնի թափանցող հրազենային գնդակային վիրավորում, աղիների վնասում, միջընդերային անոթների վնասում, հեմորագիկ շոկ: Սպանվածը ամուսնացած էր, ուներ 7 եւ 2 տարեկան դուստրեր:
