Հեպատիտ Բ-ի և Ց-ի առումով Հայաստանը գտնվում է միջին տարածվածության երկրների շարքում:
«Հեպատիտը վիրուսային վարակիչ հիվանդությունների խումբ է: Առավել տարածված են հեպատիտների Ա，Բ，և Ց տեսակները: Ա-ն համարվում է աղիքային վարակիչ հիվանդություն， քանի որ փոխանցվում է բերանի խոռոչով` ջրի， սննդի միջոցով， մինչդեռ Բ և Ց տեսակները օրգանիզմ են ներթափանցում արտաընդերային եղանակով` արյան կամ սեռական ճանապարհով»，- այս մասին այսօր ՀՀ առողջապահության նախարարությունում կայացած ասուլիսի ժամանակ հայտնեց ՀՀ առողջապահության նախարարության հիգիենիկ և հակահամաճարակային տեսչության Վարակիչ և ոչ վարակիչ հիվանդությունների համաճարակաբանության բաժնի պետ， բժշկական գիտությունների թեկնածու Լիլիթ Ավետիսյանը:
Տիկին Ավետիսյանի հավաստմամբ` այսօր այս հիվանդությունը փոքր-ինչ նվազել է， քանի որ շատ մեծ ուշադրություն են դարձնում հիգիենային: Բանախոսը ներկայացրեց Առողջապահության համաշխարհային կազմակերպության տվյալները， համաձայն որոնց` աշխարհում տարեկան արձանագրվում է վիրուսային հեպատիտ Ա-ի մոտ 1.4 մլն դեպք: Երկրագնդի բնակչության 2-7% մոտ առկա է հեպատիտ Բ-ի վիրուսակրություն， ընդ որում` նրանցից 240 մլն-ը հիվանդ է հեպատիտ Բ-ի քրոնիկ ձևերով, ինչի հետևանքով տարեկան մոտ 600 հազար մարդ է մահանում: Հեպատիտ Բ-ի վիրուսը առաջացնում է քաղցկեղ: Աշխարհի ազգաբնակչության 150 մլն-ից ավելին վարակված է հեպատիտ Ց-ով: Հայաստանում հեպատիտներով հիվանդացության ընդհանուր կառուցվածքում մոտ 50% բաժին է ընկնում հեպատիտ Ա-ին， իսկ անցած տարվա տվյալներով գրանցվել է հեպատիտ Ց սուր վիրուսակրության 32 դեպք:
«Այս հիվանդությունները մնում են ամբողջ աշխարհում առողջապահական համակարգի կարևորագույն հիմնախնդիրները， սակայն աշխարհում քայլեր են ձեռնարկվում դրանք բուժելու համար: Հեպատիտների Ա և Բ տեսակները համարվում են կառավարելի հիվանդություններ, քանի որ դրանց դեմ կիրառվում են պատվաստանյութեր, իսկ հեպատիտ Ց-ի դեմ պատվաստանյութի ստեղծման ուղղությամբ աշխատանքները դեռ շարունակվում են և մոտ 2-3 տարի անց այն նույնպես կլինի: Հեպատիտները մեծ հարված են մարդկության սոցիալ-տնտեսական զարգացվածությանը »，- ասաց Լիլիթ Ավետիսյանը:
Տիկին Ավետիսյանը նշեց հեպատիտների կանխարգելման երկու հիմնական միջոցներ` իրազեկվածությունը և հիգիենայի պահպանումը. «Տարբեր ճանապարհներ կան， որոնց միջոցով մարդիկ կարող են տեղեկանալ հիվանդությունների， ինչպես նաև դանց ախտանիշների մասին: Բացի այդ， այսօր պետք է պահանջատեր լինել, որպեսզի վարսավիրանոցներում， բուժկետերում մարդկանց հիգիենիկ պայմաններում սպասարկեն»:
«Հեպատիտ Բ-ի և Ց-ի առումով Հայաստանը գտնվում է միջին տարածվածության երկրների շարքում»，-ասաց «Նորք» ինֆեկցիոն հիվանդանոցի հեպատոլոգիական բաժանմունքի վարիչ， Հայաստանի լյարդաբանների ասոցիացիայի նախագահ， լյարդաբանների միջազգային մի շարք ասոցիացիաների անդամ， բժշկական գիտությունների թեկնածու Հասմիկ Ղազինյանը:
Տիկին Ղազինյանը նշեց， որ տարիքային խմբերի փոփոխման հետ միասին փոփոխվում է նաև հեպատիտ Բ-ի տարածման ուղին， որը ներկայումս սեռական ճանապարհն է: Վիրուսի տարածման գործում մեծ դեր է խաղում նաև ներգաղթը և արտագաղթը:
Անդրադառնալով բուժման տևողությանը` Հասմիկ Ղազինյանը նշեց, որ այն կախված է ախտորոշման ստադիայից և կարող է տևել 16 շաբաթից մինչև 72 շաբաթ: «Պետք է ասեմ， որ այսօր， ցավոք， բուժումը բավականին թանկ է: Մեկ ամսվա կուրսը արժե 1000-1200 ամերիկյան դոլար: Սակայն դեղամիջոցները ունեն միջազգային գին և Հայաստանում այն շատ չի տարբերվում այլ երկրներում ներկայացված գնից»，- ասաց տիկին Ղազինյանը:
Լուսինե ՇԱԽԱԶԻԶՅԱՆ
