ԲՀԿ մամուլի խոսնակ Տիգրան Ուրիխանյանը՝ գծատեր ԲՀԿ-ականների եւ ընդդեմ ուղեվարձի թանկացման պայքարող ԲՀԿ-ականների մասին
– «Չենք վճարելու 150 դրամ» ակցիաներին Դուք մասնակցում էիք պետհամարանիշով մեքենայով. դա խնդիրներ չառաջացրե՞ց:
– Ոչ, իհարկե, ավտոմեքենան, դրա սպասարկումը, վառելիքը եւ այլն պատկանում է ինձ ու իրականացվում է անձնական միջոցներով: Պետհամարանիշների առկայությունը նրա համար էր, որպեսզի այդ պատանիներն ու երիտասարդները տեսնեին, որ իրենց կողքին կա նաեւ պետական ծառայող, օրենսդիր: Նպատակը ոգեւորելն ու ոգեշնչելն էր:
– Որոշ ԲՀԿ-ականներ նույնպես գծատերեր են, նրանցից ոմանք անգամ պատգամավորներ են: ԲՀԿ խմբակցության պատգամավոր Հարություն Ղարագյոզյանն, օրինակ, օրերս «Հրապարակ» թերթին տված հարցազրույցում պաշտպանել էր ուղեվարձի թանկացման պաշտոնական հիմնավորումները, միեւնույն ժամանակ ԲՀԿ-ական այլ պատգամավորներ փողոցում պայքարում էին ընդդեմ 150 դրամ ուղեվարձի: Ստացվում է, որ ԲՀԿ-ականների մի մասը պայքարում է ԲՀԿ-ականների մեկ այլ մասի դե՞մ:
Կարդացեք նաև
– Իհարկե, ոչ: Այնքան էլ այդպես չէ, որովհետեւ Հարություն Ղարագյոզյանը չի կարող ունենալ այլ կարծիք: Նա կիսում է խմբակցության տեսակետը: Առանձին վերցրած, կոնտեքստից հանած նախադասությունները, որոնք վերաբերում են տվյալ բիզնեսին, չեն կարող արտահայտել քաղաքական դիրքորոշում:
– Դարձյալ լրագրողնե՞րն են մեղավոր:
– Ոչ: Եթե Հարություն Ղարագյոզյանն առանձին վերցրած մտքերով արտահայտել է տվյալ բիզնեսի տեսանկյունը, դա չի նշանակում, որ նրա քաղաքական դիրքորոշումը կարող է հակասել իր խմբակցության կամ կուսակցության դիրքորոշմանը:
– Եթե Հարություն Ղարագյոզյանն այդ բիզնեսի մեջ է, կողմ է այն հիմնավորումներին, որոնք բերվել են ուղեվարձը թանկացնելու համար, ինչպե՞ս կարող է կիսել ԲՀԿ խմբակցության տեսակետը, թե դրանք հիմնավոր չեն:
– Պարոն Ղարագյոզյանը հարկադրված պիտի իր շահերը ստորադասի տվյալ պահին՝ սոցիալական խնդիր առաջացրած իրավիճակում ժողովրդի դիրքերին:
– Իսկ ԲՀԿ անդամ գծատերերի հետ եղե՞լ է զրույց, նրանց ասվե՞լ է, որ պարտավոր են իրենց շահը ստորադասել հանրության շահին:
– Մի շարք փոխադրող ընկերությունների ղեկավարների հետ եղել են հանդիպումներ: Այդ պահին Հայաստանում չգտնվելու պատճառով չեմ տիրապետում ամբողջական տեղեկատվությանը, բայց ենթադրում եմ, որ եղել է նման խոսակցություն:
– «Երեւան քաղաքում տեղական ինքնակառավարման մասին» օրենքի 18-րդ հոդվածի համաձայն՝ ավագանու անդամների մեկ հինգերորդը, ինչպես նաեւ յուրաքանչյուր խմբակցություն կարող են դիմել վարչական դատարան՝ ավագանու եւ քաղաքապետի ակտերի իրավաչափությունը վիճարկելու հարցով: Ավագանու ԲՀԿ խմբակցությունը պատրաստվո՞ւմ է վիճարկել Տարոն Մարգարյանի՝ ուղեվարձը թանկացնելու որոշումը:
– Ցանկացած վիճահարույց հարցի կամ իրեն չբավարարող իրավիճակի զարգացման պարագայում հայցով դատարան դիմելու իրավունք ունի ՀՀ ցանկացած քաղաքացի, այդ թվում նաեւ պաշտոնատար անձի դեմ: Ե՞րբ եւ ի՞նչ կձեռնարկի խմբակցությունը՝ ես սիրով կտեղեկացնեմ:
– ԲՀԿ-ն շարունակելո՞ւ է պայքարել:
– Չեմ ցանկանում նույնիսկ ճշգրտող հարց տալ, թե հատկապես ի՞նչը նկատի ունեք, քանի որ ԲՀԿ-ն պայքարում է հայաստանցիների շահերը չներկայացնող բոլոր երեւույթների դեմ եւ շարունակելու է այդ պայքարը:
– Այս օրերին դիտարկումներ եղան, որ ԲՀԿ-ն քնից արթնացել ու նորից պայքարում է՝ նկատի առնելով նախագահական եւ Երեւանի ավագանու ընտրություններից հետո կուսակցության պասիվ կեցվածքը, անգամ կառավարության 2012 թվականի ծրագրի կատարողականի եւ ՎՊ-ի 2012 թվականի աղմկահարույց հաշվետվության քննարկումների ժամանակ:
– Դուք խոսում եք ԲՀԿ մի պատգամավորի հետ, ով ամենակոշտ ելույթներից մեկն է ունեցել ՎՊ-ի զեկույցի ժամանակ՝ հորդորելով ու պահանջելով, որպեսզի նյութերն ուղարկվեն դատախազություն եւ քրեական գործեր հարուցվեն:
– Կուսակցությունն այդ ընթացքում ավելի պասիվ եւ զուսպ էր:
– Ես կուսակցությունն եմ ներկայացնում եւ կուսակցության քաղաքական կուրսի շրջանակներում եմ գործել ու գործում: Կարծում եմ՝ հնացած է հարցը՝ պասիվ էիք, ակտիվացել եք: Այն ամենը, ինչի մասին մենք նախազգուշացրել ենք, սկսում է իրականանալ:
– Սոցիալական բունտի նախադրյալներ տեսնո՞ւմ եք:
– Իսկ դուք համարում եք, որ սոցիալական դժգոհությունը կիզակետին չի՞ հասել: Սոցիալ-տնտեսական իրավիճակի համար պատասխանատու եւ քաղաքականություն վարող կառավարությունը չի՞ տեսնում՝ ինչ է տեղի ունենում, ինչպես են մարդիկ արտագաղթում, ինչպես է ցանկացած թանկացումն անդրադառնում քաղաքացու եկամուտների նվազման եւ կենսակերպի վրա: Այսինքն՝ պիտի լինեն կտրուկ, պարտադրող գործողություննե՞ր, որպեսզի վերջում այս մարդկանց հոգիներում ինչ-որ մի բա՞ն առաջանա՝ ողորմածության, կամեցողության ու կարեկցանքի պես, իրենց համերկրացիների նկատմամբ:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
