Որքա՞ն խճճված էր Հենրիխ Մխիթարյանի՝ «Շախտյորից» եվրոպական մեկ այլ ակումբ տեղափոխվելու պատմությունը, որը հստակություն ստացավ միայն վերջին պահին:
Հիմա նույնը կրկնվում է Կրասնոդարի «Կուբանի» եւ Հայաստանի ազգային հավաքականի կիսապաշտպան Արաս Օզբիլիսի հետ: Օզբիլիսի ծառայություններով հետաքրքրված են Մոսկվայի «Սպարտակն» ու «Լոկոմոտիվը», ֆրանսիական «Մոնակոն»: Դա ոչ ոք չի հերքում: Ռուսական լրատվամիջոցները վերջին օրերին համառորեն պնդում են, որ ֆուտբոլիստը ամենամոտ ժամանակներս կտեղափոխվի «Սպարտակ», որ մոսկովյան ակումբը բանակցում է «Կուբանի» ղեկավարության հետ, որ ֆուտբոլիստն արդեն համաձայնեցրել է թրանսֆերի մանրամասները եւ պայմանագիրը ստորագրել: Սակայն «Կուբանի» ղեկավարությունը համառորեն հերքում է այդ բոլոր լուրերը: Մասնվավորապես, տնօրենների խորհրդի անդամ Սուրեն Մկրտչյանն օրերս հայտարարել էր, թե Օզբիլիսի տեղափոխման մասին իրեն ոչինչ հայտնի չէ: Եվ ահա «գործին» խառնվել է նաեւ Կրասնոդարի երկրամասին փոխնահանգապետ Իվան Պերոնկոն: Р-Спорт-ի հետ զրույցում պաշտոնյան ասել է. «Այդ լուրերը չեն հաստատում ոչ ակումբի ղեկավարությունը, ոչ ներդրողները՝ ոչ ոք: «Կուբանն» առայժմ Օզբիլիսի տեղափոխման մասին պաշտոնական ոչ մի առաջարկ չի ստացել: Ակումբի ղեկավարությունը հիմա տեղում չէ. նախագահը մեկնել է գործուղման, տնօրենների խորհրդի նախագահը դրսում է, դրա համար էլ ոչ ոք բանակցություն չի վարում: Դրանք սոսկ ենթադրություններ են կամ ինչ-որ մեկի ցանկությունը, այլ ոչ թե իրականություն», – հայտարարել է փոխնահանգապետը:
Իվան Պերոնկոն նաեւ հերքել է այն լուրը, ըստ որի Արաս Օզբիլիսն իբրեւ գնացել է թիմից եւ չի մասնակցի Ռուսաստանի պրոֆեսիոնալ լիգայի՝ «Զենիթի» հետ հանդիպմանը:
Աշոտ ՀԱԿՈԲՅԱՆ
