Աշխատակիցները պատճառաբանում են, թե գլանման արտադրամասը համարվում է առողջության համար վնասակար, մինչդեռ ՀՀ կառավարության որոշմամբ հաստատված ցուցակներում այդ արտադրամասը ներառված չէ ծանր, վնասակար կամ առանձնապես վնասակար աշխատանքների ցանկում:
Երկու տարի առաջ «ՌուսալԱրմենալ» գործարանի գլանման արտադրամասի 101 բանվորների ներկայացրած՝ վնասակար պայմանների համար աշխատավարձի հավելավճարի պահանջն առ այսօր չի բավարարվել, այն այսօր էլ շարունակում է մնալ օրակարգային: Դատական ատյաններում 101 աշխատողների ներկայացուցիչ, փաստաբան Լեւոն Բաղդասարյանը նրանց վստահեցրել է, որ իրենք որպես վնասակար պայմաններում աշխատողներ պետք է օգտվեն «Պետական կենսաթոշակի մասին» ՀՀ օրենքի 10-րդ հոդվածով սահմանված վաղաժամ կենսաթոշակի անցնելու իրավունքից, ՀՀ աշխատանքային օրենսգրքի համաձայն՝ ամենամյա լրացուցիչ արձակուրդից, ինչպես նաեւ ՀՀ Աշխատանքային օրենսգրքի 183 հոդվածով սահմանված՝ աշխատավարձի հավելումից: Թեեւ առաջին ատյանի դատարանի ընդունած որոշման համաձայն՝ գործարանը բանվորներին պետք է վճարի աշխատավարձի 50%-ի չափով հավելավճար, սակայն վերաքննիչ եւ վճռաբեկ դատարանների կողմից բանվորների հայցապահանջը մերժվել է:
«ՌուսալԱրմենալ» ընկերության աշխատակազմային տնօրեն Սվետլանա Լեւենի ներկայացմամբ՝ գործարանի ղեկավարությունն առաջնորդվում է ՀՀ Աշխատանքային օրենսգրքով. «Դատարան դիմած աշխատողների պահանջը հիմնավորված չէ: Նրանք պատճառաբանում են, թե գլանման արտադրամասը համարվում է առողջության համար վնասակար, մինչդեռ ՀՀ կառավարության որոշմամբ հաստատված ցուցակներում այդ արտադրամասը ներառված չէ ծանր, վնասակար կամ առանձնապես վնասակար աշխատանքների ցանկում: Եթե ՀՀ կառավարությունը վերանայի իր որոշումը եւ ընդունի նոր որոշում, ապա մենք կառաջնորդվենք դրանով»:
Նշենք, որ խոսքը ՀՀ կառավարության 02.12.2010թ. թիվ 1698-Ն որոշմամբ հաստատված ծանր, վնասակար արտադրությունների, աշխատանքների, մասնագիտությունների եւ պաշտոնների N 1 եւ առանձնապես ծանր, առանձնապես վնասակար արտադրությունների, աշխատանքների, մասնագիտությունների եւ պաշտոնների N 2 ցանկերի մասին է, որոնցում գործարանի 101 աշխատակիցների մասնագիտություններն ընդգրկված չեն:
Ընկերության արտադրության գծով տնօրեն Լեռնիկ Իսոյանի փոխանցմամբ՝ աշխատանքի ընդունվելուց առաջ աշխատողները ծանոթանում են աշխատանքային պայմաններին եւ նոր միայն դիմումով ընդունվում աշխատանքի:
«Աշխատանքային պայմանագրի որեւէ կետ չի խախտվում, աշխատանքային ժամերի քանակը չի գերազանցում օրենքով սահմանված ժամերը: Առ այսօր երկար տարիներ աշխատած բանվորներից ոչ մեկը մասնագիտական հիվանդություն ձեռք չի բերել: Այնպես որ՝ ձեռնարկության ղեկավարությունն իր դիրքորոշումը հիմնավորում է ՀՀ կառավարության ընդունած որոշմամբ»,- պարզաբանում է պարոն Իսոյանը:
Այս առնչությամբ «ՌուսալԱրմենալ» գործարանի արհմիությունների կոմիտեի նախագահ Գայանե Բրուտյանը հայտնեց, որ անցյալ տարի ՀԱՄԿ-ի անդամ լեռնագործների, մետաղագործների եւ ոսկերիչների արհեստակցական միությունների ՃՀՄ-ի նախագահ Անաստաս Փահլեւանյանի եւ ՀԱՄԿ-ի իրավաբանական բաժնի պետ Միքայել Փիլիպոսյանի հետ քննարկվել է կառավարության կողմից հաստատված ցուցակներում վերոհիշյալ արտադրամասի բացակայության խնդիրը: Ըստ նրանց՝ եզրակացությունը մեկն է, հարցը հնարավոր է լուծել կառավարության մակարդակով: «ՌուսալԱրմենալ» ընկերության աշխատողների պահանջը կարող է բավարարվել միմիայն ՀՀ կառավարության կողմից հաստատված վնասակար աշխատանքների ցուցակների եւ ընդունած որոշումների վերանայման դեպքում:
ԱՆՈՒՇ ՆԵՐՍԻՍՅԱՆ
«Առավոտ» օրաթերթ
