«Շոգ եղանակին որքան հնարավոր է հեղուկ պետք է օգտագործել: Եթե նորմալ պայմաններում մարդը օրական խմում է 2 լիտր ջուր, ապա ամռանը մոտ 3 լիտր ջուր պետք է օգտագործել: Այն մարդիկ, որոնք սրտանոթային կամ երիկամային խնդիրներ ունեն՝ օգտագործվող ջրի քանակը պետք է քննարկեն իրենց բժիշկների հետ»,- այս մասին այսօր «Ազդակ» մամուլի ակումբում տեղի ունեցած ասուլիսի ժամանակ հայտնեց ՀՀ առողջապահության նախարարության պետական հիգիենիկ եւ հակահամաճարակային տեսչության, իրավաբանական ապահովության բաժնի պետ Նունե Բակունցը:
Տիկին Բակունցը նշեց, որ շոգ եղանակին բացի ջրից՝ կարելի է օգտագործել նաև հանքային ջուր, ինչպես նաև ոչ գազավորված թան. «Բացի ջրից, կարելի է խմել նաև մեր ավանդական թանը， իհարկե ոչ գազավորված և ոչ շատ աղի: Այն իր մեջ պարունակում է մարդու օրգանիզմի համար անհրաժեշտ ջուր, աղեր և սպիտակուց: Հեղուկը շատ կարևոր է մարդու օրգանիզմի համար， անգամ մարդու տրամադրության անկման պատճառ կարող է դառնալ հեղուկի պակասը»:
Նունե Բակունցը խորհուրդ տվեց ամռանը քիչ օգտագործել շաքար կամ կոֆեին պարունակող ըմպելիքներ. «Ճիշտ է՝ սուրճը կամ շաքար պարունակող ըմպելիքները թարմացնում են, բայց դա երկար չի տևում: 5 րոպե անց մարդ ավելի շատ հոգնածություն է զգում»:
Խոսելով ըմպելիքների ջերմաստիճանի մասին` տիկին Բակունցը նշեց, որ դրանք պետք է լինեն ոչ թե սառը, այլ զովացրած: «Ըմպելիքները պետք է խմել ոչ շատ սառը վիճակում: Սառեցված ըմպելիքը կարող է դառնալ ամառային ծանր անգինայի պատճառ»:
Կարդացեք նաև
ՀՀ առողջապահության նախարարության պետական հիգիենիկ եւ հակահամաճարակային տեսչության, իրավաբանական ապահովության բաժնի պետը նշեց նաև օրվա պլանավորման կարևորության մասին. «Պետք է պլանավորել աշխատանքային օրը այնպես， որ ժամը 12-17-ը արևի տակ չգտնվել, քանի որ դա օրվա ամենաշոգ հատվածն է: Ուլտրամանուշակագույն ճառագայթները աչքերի և մաշկի հետ կապված խնդիրների կարող են հանգեցնել: Այդ իսկ պատճառով, պետք է կրել ակնոցներ， գլխարկներ և հագնել բաց գույնի հագուստ: Այդ ժամերին հարկավոր է ուտել միրգ և բանջարեղեն， իսկ դժվարամարս ուտելիքները օգտագործել կամ առավոտյան կամ երեկոյան, երբ հով է»:
Ծովափում հանգստացող քաղաքացիներին տիկին Բակունցը խորհուրդ տվեց խուսափել արևայրուքից. «Արևայրուքը պետք է չափավոր ընդունել և ցանկալի է ոչ շատ շոգ եղանակին， քանի որ արևայրուքի չարաշահումը կարող է նպաստել մաշկի քաղցկեղի առաջացմանը»:
Լուսինե ՇԱԽԱԶԻԶՅԱՆ
