«Ազատություն» ռադիոկայան. Միացյալ Նահանգների նախկին նախագահ Զորջ Բուշ ավագը խուզել է մազերը, այսպիսով իր աջակցությունը ցույց տալով 2 տարեկան մի տղայի, ով զրկվել է մազերից լեյկոզի դեմ բուժում ստանալու արդյունքում:
ԱՄՆ-ի 89-ամյա նախկին նախագահի գրասենյակը հայտարարել է, որ Բուշը եւ նրա 26 աշխատակիցները խուզել են մազերը` նախկին նախագահի անվտանգության աշխատակիցներից մեկի մանկահասակ որդուն` Պատրիկին իրենց աջակցությունը ցույց տալու համար:
Բուշի աշխատակիցները նաև մի վեբկայք են ստեղծել, որով փորձում են գումար հայթայթել երեխայի բուժման ծախսերը հոգալու համար:
1989-ից 1993 թվականներին ԱՄՆ նախագահի պաշտոնը զբաղեցրած Բուշը եւ նրա կինը` Բարբարան, շուրջ 60 տարի առաջ կորցրել են իրենց 4-ամյա դստերը` Ռոբինին, ով լեյկոզով հիվանդ էր:
