Մարզպետարանի կայքում որոշումների հավելվածները չկան
Հուլիսի 18-ին Տավուշի մարզպետ Արմեն Ղուլարյանը որոշում է ընդունել 2013թ. առաջին կիսամյակի արդյունքներով մարզպետարանի աշխատակազմի քաղաքացիական ծառայողներին պարգեւատրել մարզպետարանի աշխատակազմի պահպանման «Քաղաքացիական, դատական եւ պետական այլ ծառայողների պարգեւատրում» հոդվածով նախատեսված միջոցներից՝ համաձայն որոշման հավելվածի:
Նույն օրը մարզպետը մեկ այլ որոշում է ընդունել՝ մարզպետարանի աշխատակազմի հայեցողական պաշտոններ զբաղեցնող անձանց պարգեւատրել մարզպետարանի աշխատակազմի պահպանման «այլ վարձատրություններ» հոդվածով նախատեսված միջոցների հաշվին:
Սույն որոշումների կատարումը մարզպետը հանձնարարել է մարզպետարանի աշխատակազմի ղեկավար, գլխավոր ֆինանսիստ Սվետլանա Դավթյանին:
Կարդացեք նաև
Թեեւ մարզպետի որոշումներում նշված է դրանց հավելվածների մասին, սակայն մարզպետարանի ինտերնետային կայքում(www.tavush.gov.am) այդ հավելվածները չկան: Դրանցում հավանաբար պետք է նշված լինեին պարգեւատրվողների անունները, նրանց պաշտոնները, պարգեւատրման գումարի չափը:
Հարց է ծագում՝ ի՞նչ հաջողությունների համար են պետական բյուջեի սուղ միջոցներից պարգեւատրվում մարզպետարանի աշխատողները՝ մարզի համայնքների բյուջեների, սեփական եկամուտների ցածր կատարողականի՞, մարզում գյուղատնտեսական շուկաների , մսի, բրդի, կաշվի,հավի ձվի մթերման կայանների, հակակարկտային կայանների բացակայությա՞ն, սահմանամերձ մարզից շարունակվող արտագաղթի համա՞ր, թե՞….
Ոսկան ՍԱՐԳՍՅԱՆ
