«Տրանսպորտի գինը կվերադառնա հարյուր դրամի՝ ես դրանում կասկած չունեմ»,-այսօր «Երկու երես» մամուլի ակումբում հայտարարեց «Ռազմավարական և ազգային հետազոտությունների հայկական կենտրոն»-ի փորձագետ, քաղաքագետ Սարո Սարոյանը:
Նա կարևոր համարեց հետևյալ հանգամանքները. «Կարևոր է այն, որ հատկապես ուսանողությունը ուսման պրոցեսի մեջ չէ և ազատ ժամանակ շատ ավելի ունի, քան կլիներ ուսման պրոցեսի ժամանակ: Նա կաշկանդված չէ նույն ուսումնական հաստատությունների ղեկավար կազմի խոչընդոտներով: Ուսանողության գիտակցական մակարդակը բարձրացել է»:
Ս. Սարոյանը կարծում է, որ վարչախմբին փաստի առաջ են կանգնեցրել. «Առաջին օրերին վարչախումբը դաշտ բերեց կրիմինալին, թաղային խուժանին, հետո ոստիկանությանը, որին հրահանգված էր տարբեր ձևերով խոչընդոտել այս ակտիվությանը: Բայց իրականում վարչախումբը չի հասցնում դեպքերի ընթացքի հետևից, չի հասկանում՝ ինչն է կատարվում Երևանում և չի կարողանում դեմն առնել այս իրավիճակի»:
Ըստ Ս. Սարոյանի՝ այս ամենը մի քանի օր դեռ կտևի, ու չպետք է բացառել, որ վարչախումբը կգնա կոշտ ուժային տարբերակով շարժումը լռեցնելու:
Կարդացեք նաև
Հարցին՝ ինչո՞ւ դեռ վարորդները չեն ինքնակազմակերպվում, «Հայազն» կուսակցության մամուլի խոսնակ Արմեն Հովհաննիսյանը պատասխանեց. «Ինձ զարմացնում են այն հեքիաթները, թե ուղեվարձի թանկացումից հետո վարորդները կլինեն մաքուր, շպարված օսլայված, մի քանի լեզվի տիրապետող: Ուստի կարող են վարորդներին վախեցնել, թե աշխատանք կկորցնես, նույն հեքիաթներն են նրանց պատմում, թե ավելի լավ աշխատանքային պայմաններ կստեղծվեն: Այս հարցի պատասխանն է տվել գիծ աշխատացնելուց շատ լավ հասկացող մարդ Գալուստ Սահակյանը՝ նշելով, որ վարորդների աշխատավարձը չի բարձրացվելու»:
«Հայազն» կուսակցության վարչության անդամ Արմեն Մկրտչյանը հիշեցրեց Գագիկ Բեգլարյանի այն հայտարարությունը, թե «տրանսպորտի թանկացումը լինելու է հօգուտ ժողովրդի» և փաստեց, որ թանկացումը ժողովրդին միավորեց ու ինքնակազմակերպեց:
Ա. Մկրտչյանն ասաց, որ իրենք «հույս չունեն, որ Տարոն Մարգարյանը, Գալուստ Սահակյանը, Տիգրան Սարգսյանը և այլք պիտի իրենց գծերից հրաժարվեն»: Այնուհետև տեղեկացրեց, որ իրենք քաղաքապետարանին պահանջագիր են ներկայացրել, որ անհիմն թանկացումը, գծատերերի հասկացությունը չեղյալ համարեն, վճարի համակարգից փոփոխություն կատարվի դեպի քարտային վճարման համակարգ, բարելավվի վարորդների աշխատանքային ռեժիմը:
Aravot.am-ի հարցին՝ ինչպիսի՞ գնահատական կտաք ոստիկանության պահվածքին, ակտիվիստների դեմ բռնություններին, Ա. Մկրտչյանը պատասխանեց. «Բարձրաստիճան ոստիկանները պրովոկացիաներ են անում՝ փոխգնդապետեր, գնդապետեր: Բայց կան ոստիկաններ, որոնց հետ միջոցառում անելը մեզ համար հաճելի ու ապահով է: Ուստի ոստիկանների ճնշող մեծամասնությունը մեր կողքին են»:
Ա. Մկրտչյանը փաստեց, որ «փորձում են Տարոն Մարգարյանին քավության նոխազ դարձնել» ու շարունակեց. «Իշխանությունների սոխակները սկսել են սոցցանցերում ակտիվորեն քննադատել Տարոնին, բնականաբար դա պատահական չէ, այս ամենը իշխանության կողմից ուղղորդված է: Բոլոր սլաքները փորձում են Տարոնի վրա տանել, բայց հասկանում ենք, որ Տարոնը նման որոշում ինքնագլուխ կայացնել չէր կարող: Տարոնին փորձում են իշխանության քավության նոխազ դարձնել:Մենք տեսել ենք «Տարոն սիրուն չի»-ի դեպքը, երբ շոու կազմակերպեցին: Հիմա էլ հնարավոր է նման ռիսկ, բայց այս ընդվզումից հետո հնարավոր չի լինի Սերժ Սարգսյանի գթասրտությունը ներկայացնել ժողովրդին»:
Ա. Մկրտչյանը տեղեկացրեց, որ այսօր ժամը 18.00-ին երթ է կազմակերպվելու:
Տաթև ՀԱՐՈՒԹՅՈՒՆՅԱՆ
